УИХ-ын гишүүн,  МАН-ын бүлгийн дарга С.Бямбацогтын тухай “Бямбацогт гишүүнийг дагаж яваад нэг гар утастай болчих юмсан” гэсэн онигоо сүүлийн үед гарсан байна. Энэ нь УИХ-ын гишүүн шинэ харцага Б.Пүрэвсүрэнд унаж явсан машинаа өгсөнтэй холбоотой гэнэ. “Ланд-200” машины эзэн болох Б.Пүрэвсүрэн энэ жилийн улсын баяр наадмаар зургаа давж Монгол Улсын Харцага цол хүртсэн. Харин тэрээр шинэхэн цолоо Ховд аймагт болсон баруун бүсийн даншиг наадамд дуудуулсан гэнэ. Энэ үеэр УИХ-ын гишүүн түүнд унаж явсан “Ланд-200” маркын машинаа бэлэглэжээ. Энэ нь ч учиртай аж. Б.Пүрэвсүрэн УИХ-ын гишүүн С.Бямбацогтын “Нью Прогресс” группын нэр дээр барилддаг юм байна.

Эрхэм гишүүн баруун бүсийн даншиг наадамд оролцох үеэрээ сонин ихтэй явсан гэнэ. Говь-Алтай аймгийн Халиун сумаас наадамд морь унахаар ирсэн хүүд хүртэл тус хүргээд амжсан байна. Унаач хүү машинаасаа хоцорч уйлж зогсохтой УИХ-ын гишүүн таараад морины гараанд хүргэж өгчээ. Тэгэхдээ бүр уралдааныг эхлүүлэхгүй байхыг хүссэн байна. Хүү ч амжиж очиж хязаалан насны морьдын уралдаанд айргийн гуравт хурдалжээ. Ямартай ч эрхэм гишүүн сонин их наадамлаж явна. Одоо гишүүний очсон газар, явсан сум бүрт ямар гэнэтийн бэлэг барих бол гэж иргэд, сонгогчдынх нь чих сортолзож байдаг болсон гэнэ шүү.

Д.Цэцэг