Д.Жавхлан

Монголын дугуйн спортын нэрт тамирчин, ОУХМ Д.Оргодол агсаны нэрэмжит насанд хүрэгчдийн улсын аварга шалгаруулах тэмцээн өнгөрсөн амралтын өдрөөр түүний төрсөн нутаг болох Төв аймгийн Зуунмод хотноо болж өндөрлөлөө. Тус тэмцээнд долоон байгууллагын 60 орчим тамирчин цуваа болон бөөн гарааны дөрвөн зайд хурд хүчээ сорин өрсөлдсөн юм. Тэмцээний эхний өдөр эрэгтэйчүүдийн 25 км-ийн цуваа гараанд 29 дугуйчин уралдахад “Алдар” спорт хорооны тамирчин ОУХМ Т.Төгөлдөр 34:47:16 минутын амжилтаар бусдыгаа хошуучлав. Тэгвэл эмэгтэй 25 км-ийн цуваа уралдаанд Төв аймгийн тамирчин Ж.Өлзийнсолонго 39:42:26 минутаар өөрийн багт алтан медалийг авчирав. Харин тэмцээний сүүлийн өдөр эмэгтэй 50 км-ийн бөөн гарааны төрөлд “Хүч” спорт хорооны тамирчин, 2013 оны Ази тивийн аварга, ОУХМ Т.Энхжаргал нэг цаг 26:26:53 минутанд замаа дуусгаж алтан медальд төвөггүй хүрсэн юм. Үүний араас спорт сонирхогчдын хамгийн ихээр хүсэн хүлээдэг төрөл болох эрэгтэй 150 км-ийн бөөн гараанд 25 дугуйчин уралдсанаас Төв аймгийн “Төв зам” компанийн тамирчин, ОУХМ Э.Мөнхтулга дөрвөн цаг 12:56 минутын амжилтаар нутагтаа хоёр дахь алтан медалийг авчирлаа. Ингэснээр Төв аймгийн дугуйчид багийн дүнгээр тэргүүлж шилжин явах цомын эзэд боллоо.