Ч.Зотол

Гадаадын залуу Монгол судлаачдыг бэлтгэх, Монгол судлалыг хөгжүүлэх зорилгоор зохион явуулдаг залуу Монгол судлаачдын зуны сургалт өчигдөр нээлтээ хийлээ.  

Энэ удаагийн сургалт Боловсролын сайд Л.Гантөмөрийн ивээлд болж байгаагаараа онцлог  бөгөөд  найман  орны 45 судлаач   оролцох юм байна. Монголын төр, засгийн зүгээс   монгол судлалыг дэмжих, хөгжүүлэх бодлого баримталж,  залуу монгол судлаачдыг бэлтгэхэд анхаарч ирсэн. Тэгвэл энэ удаагийн сургалт ч гэсэн тэрхүү бодлогод нийцүүлэн Монгол судлалын төвүүдэд суралцаж буй залуу судлаачдыг урьж оролцуулжээ. Нөгөөтэйгүүр, Монголыг олон улсад төлөөлөхүйц хэмжээнд судалгаа, шинжилгээ явуулж буй залуу судлаачдад урам өгөх, бодлогоор дэмжих, монгол орон, монголчуудын ахуй амьдралтай бичелэн танилцах боломж олгож байгаагаараа өвөрмөц юм. Мөн энэ удаагийн сургалтаар олон улсын монгол судлалын төвүүдэд ажиллаж буй монгол судлалын нэрт эрдэмтэд, тухайлбал  Кембрижийн их сургуулийн профессор Девид Смит, ОХУ-ын Санктпетрбургийн их сургуулийн  профессор М.Петрова нар  оролцож, залуу судлаачдад лекц уншиж, хичээл заах  юм байна. Өмнө нь монгол судлалын чиглэлээр Монголын эрдэмтэн судлаачид голлон хичээл зааж байсан бол энэ жилээс эхлэн гадаадын монгол судлалын төвүүдэд ажиллаж буй эрдэмтэд оролцох эхлэл ийнхүү тавигдаж байна. Цаашид энэ уламжлалыг өргөжүүлж, монгол судлалын чиглэлээр гадаадын олон судлаачийг урьж оролцуулах бодлого баримтлахаа Залуу монгол судлаачдын үндэсний төв, дэмжих санийн удирдлагууд хэллээ.