Ж.Гүнжлхам

Амралт зугаалгаар явахдаа бид хорхой шавьжинд хазуулах элбэг байдаг. Тиймээс шумууланд хазуулах, зөгийнд хатгуулах үед ямар арга хэмжээ авах талаар “Зинт” клиник эмнэлгийн эмч, АУ-ны доктор, профессор Т.Навчаа эмчээс дараах зөвлөгөөг авлаа. 

Томчууд төдийгүй бага насны хүүхдүүд шумуул, зөгий, аалз, бясаа зэрэгт хазуулах нь  элбэг байдаг. Ихэнх тохиолдолд шумуулд хазуулах нь хүнд урвал үүсгэдэггүй, эмчид хандах шаардлага гардаггүй. Бага зэрэг өвдөлттэй гүвдрүү үүсч загатнаад, маргааш, нөгөөдрөөс нь зовиур нь арилдаг.  Энэхүү загатнааг багасгахын тулд хүйтэн усаар норгосон алчуур тавих, харшлын эсрэг бэлдмэлтэй тос түрхэж болно. Тухайлбал, фенистил гелийг өдөрт дөрвөн удаа түрхэж болно. Харин зарим хүүхдэд том хэмжээний гүвдрүү үүсч улайж хавдан зовиурладаг.  Ялангуяа нүд, бэлэг эрхтэн орчим хазсан тохиолдолд маш ихээр хавддаг. Энэ тохиолдолд хазсан хэсгийг шингэн савангаар савандаж угааж хатаана. Ингээд нэг хувийн гидрокортизоны тосыг өдөрт хоёр удаа улайлт, загатнаа арилтал түрхэх хэрэгтэй. Түүнчлэн харшлын эсрэг эм уулгаж (жишээлбэл цетризины 10 мг-ийн шахмалыг наснаас хамааруулан ¼-ээс½ шахмалыг өдөрт нэг  удаа) хүйтэн жин тавих нь тустай. Өвдөлт ихтэй үед парацетамол уулгаж эсвэл лаа хэрэглэнэ. Загатнааг сайн намдааж чадаагүй тохиолдолд хүүхэд маажиж арьсаа шалбалах нь нянгийн халдвар орж идээлэх шалтгаан болдог.  Ховор тохиолдолд харшлын маш хүнд урвал үүсч болзошгүй. Энэ үед зөвхөн хазсан газарт биш бүх биеэр гүвдрүү туурч ихээр загатнах ба амьсгалахад хүндрэлтэй болдог. Мөн найтаах, ханиах, амьсгаадах, хахаж цацах, бие хөхрөх, бөөлжих, улмаар ухаан алдаж ч болно. Энэ үед хамгийн ойр эмнэлгийн байгууллагад яаралтай хандах  хэрэгтэй.  

В витамин ууж сармис, идэх нь шумуулыг үргээхгүй

Шумуул, хорхой шавьжид хазуулахгүй байхын тулд хүүхэддээ урт ханцуйтай хувцас, урт өмд өмсүүлэх хэрэгтэй. Хувцасны өнгө хэт тод хурц, эрээн, цэцгэн хээтэй биш, цайвар байвал зохино. Түүнчлэн элдэв үнэрт ялаа шумуул цуглардаг тул хоол хүнс, хог, угаадсыг бүтээх, таглах хэрэгтэй. Томчууд үнэртэй ус, хурц үнэр бүхий саван, тос зэргийг хэрэглэхгүй байх нь чухал. Шөнө, оройн цагаар гэрлээ унтраасны дараа цонхоо онгойлгох эсвэл цонхоо торлох, хүүхдийн ор, тэрэг зэрэгт тор татах хэрэгтэй. Худалдаанд байгаа  ялаа, шумуулын эсрэг спрей, тос, лосион  зэргийг зургаан сараас доош насны хүүхдийн арьсанд хэрэглэхгүй байх нь дээр. Спрейг хүүхдийн өмссөн хувцсанд цацаж болно. Мөн В витамин уух, сармис идэх зэрэг нь шумуулд хазуулахаас сэргийлдэггүй гэдгийг Америкийн хүүхдийн эмч нарын нийгэмлэгээс тогтоосон байдаг. Тэгэхээр элдэв шавьж, шумуулд хазуулахаас сэргийлэхийн тулд дээрх бүтээгдэхүүнийг хэрэглэхгүй байхыг зөвлөе.