Ж.Гүнжлхам

Зуны халуун өдрүүдэд  бүсгүйчүүд бидэнд арьс борлох, харлах, улмаар түлэгдэж хорсох явдал цөөнгүй тохиолддог. Тиймээс арьсаа хэрхэн хамгаалах, нарны тосыг хэрхэн яаж түрхэх талаар “Зинт” клиник эмнэлгийн эмч, АУ-ны доктор, профессор Т.Навчаагийн зөвлөгөөг хүргэж байна.

Нарны туяанаас арьсаа хамгаалахын тулд нарны хамгаалалттай SPF-Sun protection factor  лосионыг тогтмол хэрэглэж занших хэрэгтэй. SPF 15-тай нь хэт ягаан туяаны 93 хувийг, харин SPF 30-тай нь 97 хувийг хамгаалдаг. Үүнийг гадаа гарахаас 30 минутын өмнө хангалттай зузаан түрхэх бөгөөд хоёр цаг тутам дахин түрхэнэ. Харин тос нь тослог өндөр, өтгөн зуурамтгай чанартай тул арьсны дулаан, хөлсийг гадагшлуулахгүй биед хуримтлуулах эрсдэлтэй байдаг.

Хэт халуунд хүүхдийг олон цагаар гадаа байлгах нь арьс түлэгдэхээс гадна нарших нөхцөл болно. Хүүхэд наршсан үед 39 хэмээс дээш халуурах ба хөлс гардаггүй, парацетамолд буурдаггүй онцлогтой. Арьс нь нилэнхүйдээ улаан, халуун байхаас гадна толгой нь хүчтэй өвдөж бөөлжинө. Наршсан үед шингэн баах буюу суулгадаггүй гэдгийг эцэг, эхчүүд анхаарах хэрэгтэй. Энэ үед усгүйжлийн шинжүүд болох ам шүлсгүй хуурай, уйлахдаа нулимсгүй, шээс ховор, зулай хонхойх зэрэг шинж илэрч болно. Энэ үед хүүхдийг сэрүүн өрөөнд оруулан сэнс асаах эсвэл сонин сэтгүүлээр сэвж сэрүүцүүлэн ус уулгана. Парацетамол хэрэглэж толгойн өвдөлтийг намдаана. Хэрвээ хүүхдийн биеийн байдал сайжрахгүй бол эмчид яаралтай хандах хэрэгтэй.