С.УЯНГА

Монгол Улсын Шадар сайд Улсын онцгой комиссын дарга Д.Тэрбишдагва өнөөдөр МХЕГ-ын дарга, улсын Ерөнхий байцаагч Д.Батмөнх нарыг дуудан боом, галзуу өвчний өнөөгийн байдал, авч хэрэгжүүлж байгаа ажлын талаар мэдээлэл сонслоо. Өнөөдрийн байдлаар Завхан аймгийн Дөрвөлжин, Говь-Алтай аймгийн Хөхморьт, Булган аймгийн Хишиг-Өндөр сумын дөрөвдүгээр багийн Нарангийн гол, нийслэлийн ХУД-ийн 13 дугаар хороонд боом өвчин гараад байгаа. Голомтод 28 өрх, 13528 мал байгаа бөгөөд 80 мал үхэж гурван хүн, 15 мал өвчилжээ. Завхан аймгийн Дөрвөлжин суманд 21 хоног, Говь-Алтай аймгийн Хөхморьт, ХУД-ийн 13 дугаар хороонд тус бүр 14 хоногийн хорио цээр тогтоон ажиллаж байгаа юм.    Шадар сайд боом өвчний голомтыг устгах, урьдчилан сэргийлэх үүднээс улсын Ерөнхий байцаагчийн албан даалгавар гарган аймаг, нийслэл, дүүргүүдийн Засаг дарга, тухайн орон нутаг дахь Мэргэжлийн хяналтын байгууллагын удирдлагуудад   өгөхийг үүрэг болголоо. Цаашид вакцины зайлшгүй нөөц бүрдүүлэх, ариутгалын бодисын чанарт анхаарах, хил дамнасан гоц халдварт, халдварт өвчнөөс урьдчилан сэргийлэх үүднээс  боомтуудад эрсдэлд суурилсан хяналт шалгалтыг эрчимжүүлэх, зорчих хөдөлгөөн ихтэй Замын-Үүд, Дорнод аймгийн Өвдөг Баянхошуу боомтод халдваргүйжүүлэлтийн пунктыг яаралтай ашиглалтад оруулж хэрэглэх химийн бодис, нөөц, чанарт анхаарахаар болов. Одоогоор Замын-Үүд боомтод тээврийн хэрэгслийн дугуйг халдваргүйжүүлэх ванныг шинээр барьж ашиглалтад оруулаад байна. Харин Дорнод аймгийн Өвдөг Баянхошуу боомтод БНХАУ-ын хөрөнгө оруулалтаар барьж байгаа халдваргүйжүүлэлтийн автомат пунктыг наймдугаар сарын нэгний  өдөр  ашиглалтад оруулах юм. Цаашид өмнөд хөрштэй хил залгаа боомтуудад тээврийн хэрэгслийн импортын чиглэлд пункт байгуулж, хил дамнасан мал, амьтны гоц халдварт, халдварт өвчнөөс халдвараас урьдчилан сэргийлэх, хорио цээрийн арга хэмжээг сайжруулах чиглэлээр ажиллах юм.  

Эх сурвалж: http://www.polit.mn