"Her presence in colours-XI" олон улсын эмэгтэй уран бүтээлчдийн үзэсгэлэн нь 1993 оноос эхлэн 2 жил тутамд дэлхийн олон орнуудад зохиогдож иржээ. БНХАУ, Малайз, Солонгос, Англи Австрали, Америк, Вьетнам зэрэг орнуудад гарч байсан энэхүү үзэсгэлэнгийн 11 дэх нь Монгол улсад анх удаа зохион байгуулагдаж байна. Тус үзэсгэлэнд ОХУ, Герман, БНХАУ, БНСУ, Сингапур, Малайз, Энэтхэг, Вьетнам, Япон, Англи, Америк, Австрали зэрэг 18 орны 124 эмэгтэй зураач, уран бүтээлчид оролцож байгаа юм. 2010 оноос эхлэн Монголын эмэгтэй уран бүтээлчид оролцож байна.

"Her presence in colours-XI" үзэсгэлэнгүүд нь тухай бүрдээ тодорхой нэг сэдвийн дагуу явагддаг уламжлалтай ба энэ удаагийн үзэсгэлэн “Хайр урлагт” сэдвээр өрнөж орон орны бүсгүйчүүдийн хайрын бэлэгдлийн зангилаа болж байгаагаараа өвөрмөц онцлогтой байна.

Үзэсгэлэнд дүрслэх урлагийн олон урсгал чиглэлээр хийгдсэн бүтээлүүд тавигдсан бөгөөд Монгол улсаа төлөөлөн оролцсон 24 бүсгүйчүүд маань монгол зураг, уран зураг, каллиграф, чимэглэх урлагийн төрлөөр хийсэн бүтээлүүдээ дэлгэжээ.

INWAC болон "Meridian Art" ТТБ, Монголын орчин үеийн УЗГалерейтай хамтран зохион байгуулж байгаа энэхүү үзэсгэлэнг Монгол Улсын Ерөнхийлөгч ивээл дороо авсан нь үзэсгэлэнгийн ач холбогдолыг тодорхойлж байгаа юм.