Ч.Зотол

Монголд хэзээ мөдгүй айлчлах гэж байгаа БНХАУ-ын  дарга Си Зиньпинийг монгол хүн гэсэн сураг чимээлэх боллоо. Гарал угсааг хөөвөл  XIII зууны үеийн Алтан ураг хавьцаа гэсэн мэдээлэл зарим сайтад гарчээ. Зарим эх сурвалжаас  Мухулай жанжны үр сад гэсэн мессэж   өгсөн  байна.

МУИС-ийн багш, хятад судлаач,  доктор Ж.Баясах өдөр тутмын сонинд  “Си Зиньпин угсаа гарвалын хувьд Шаньси мужийн хятад хүн. Гаднаас нь харахад  ч гэсэн монгол төрхтэй, монголжуу царайтай. Хятадын мужуудын нэрийг  Юань улс, Хубилай хааны үед өгсөн байдаг.    Шаньси муж  гэдэг нь “Уулын баруун”  гэсэн нэр юм.  Манайд ирэхийг урьсан хүмүүс их төлөв  Шаньси мужаас ирэгсэд  байдаг. Яагаад гэвэл  тэнд Хятадын Алтан улс, Бээжинг эзлээд захирагчаар нь Мухулай жанжин сууж байсан. Мухулай жанжны үр сад Шаньсид амьдардаг. Тэгвэл БНХАУ-ын дарга  өнгөрсөн  Цагаан сарын баяраар Шаньсид очсон байгаа юм. Тэгэхээр   Монголтой холбоотой гэж ойлгогдож байна. Мухулайн хойд удам ч юм бил үү, бид мэдэхгүй шүү дээ. Тиймээс  айлчлал нь үр дүнтэй болоосой” хэмээн ярьжээ.

 Харин БНХАУ-ын дэд дарга Ли Юаньчао Монголын зочид төлөөлөгчидтэй уулзах үеэрээ  “Миний ахын эхнэр  XIII  зууны үеийн Их Монгол Улсын үеийн монгол хатны удмын хүн”  гэж хэлсэн тухай сураг бас гараад байгаа юм.

БНХАУ-ын дарга  Си Зиньпиний ирэх сарын дундуур манай улсад хийх айлчлал анхных биш. Тэрээр өмнө нь  БНХАУ-ын  дарга Ху Жинтаогийн орлогч байхдаа Монголд айлчилж байсан. Харин энэ удаа тэрээр БНХАУ-ын дарга болоод анх удаагаа айлчлах гэж байна.