Б.Төгс

Малайзын МH17 нислэгийн дугаартай зорчигч тээврийн онгоц Украйнд сүйрч, дэлхий нийтийг цочирдолд орууллаа. Улс орнуудын зөрчилд ямар ч холбоогүй, гэм буруугүй 298 хүний амийг хороосон энэ үйлдэлд ямар хариуцлага яригдах нь одоогоор тодорхойгүй байна. Онгоцонд хэн зорчиж явсан бэ. Зорчигчдын 100 орчим нь Австралид болох ДОХ-ын эсрэг олон улсын хуралд оролцохоор явсан эрдэмтэд байж. Амьдрал дэндүү хатуурхсан эмгэнэлтэй жишээ ч байна. Өнгөрсөн гуравдугаар сард ор мөргүй алга болсон MH370 дугаартай онгоцны ослоор хүү, бэрээ алдсан Австралийн иргэн Жорж Барроузийн ач охин, хүргэн хоёр MH17-гийн зорчигчдын дунд байжээ. Харин алга болсон онгоцонд нисэх байсан ч ээлжээ сольж амьд үлдсэн үйлчлэгч эмэгтэй ижил ажил хийдэг үйлчлэгч нөхрөөсөө хагацлаа. Нөхөр нь MH17-гийн дараагийн нислэгт хуваарилагдсан байсан ч ээлжээ сольж урагшлуулсан байжээ. Түүнчлэн амь үрэгдэгсдийн дунд 16-аас доош насны 80 хүүхэд байсан байна. 86 настай ээждээ яарсан 56-тай индонез эмэгтэй, дөнгөж төрсөн хүүгээ харахаар явсан 28-тай залуу, хөлбөмбөгийн багаа дэмжихээр явсан найзууд гээд гэм зэмгүй 298 амь үгүй боллоо.

Эх сурвалж: www.polit.mn