Б.Дамдин-Очир

Хууль тогтоогчдын хэлэлцэн байж баталсан наадмын амралтыг бид сая л эдэлж дуусав. Үгүй мөн, урт амралт юм.

Наадмын хоёр хоногт Хүй долоон худаг, Төв цэнгэлдэхээр хуушуур эргүүлж, айраг ёроолдож өнгөрөөсөн манайхан 13-наас лагерь зуслан, хотын ойролцоох амралтын газрууд, ихэнх нь нутаг усаа бараадан арилж өгөв. Нэг л их бийлэгжүү монголчууд талаар, уулаар нэг. Архи уугаад, майхан сав ачсан машин тэрэгнүүд хотоос хэдэн тийш сад тавьж байлаа.

Энэ хооронд хотын хөдөлгөөн бараг үгүй болж, машин тэрэгтэй зорчиход тун чиг аятайхан байв. Гэхдээ амралтын энэ өдрүүдэд сайхнаасаа муухай нь дэндүү их байлаа.

ТҮК-ийнхэн амарснаас зуслан чигийн зам ногоон биш өнгө өнгийн тортой хогонд дарагдав. Түргэний машин зөвхөн шөнийн цагаар үйлчилдэг журам тогтоов. Хоёр ч том объектод гал гарч амралтын байдалтай байсан онцгойгийнхныг шалгаад авав. За тэгээд, банк, шуудан холбоо гээд төр, хувийн үйлчилгээнүүд ч энэ өдрүүдэд нам амрав.

Хэн нэгэнтэй утсаар холбогдох гэвэл салгаатай, холбогдсон нь согтуу, эсвэл нойрмог “Ажил эхлэхээр болъё...” гэсэн жижүүрийн хариулт хэлээд утсаа шидэх...

Долдугаар сарын 10-наас хойш улс минь нэг иймэрхүү. АПУ, Жем интернэшнл мэтийн эзэд л цулайж, бусад нь бол сархад, хорхог хоёрт харин ч нэг халаасаа гөвөөд дуусч байх шиг.

Ерөөсөө энэ амралт шал утгагүй юм. Ажилд шинээр орсон хүн дор хаяж 10 сар ажиллаж байж ээлжийн амралтаа эдлэх эрхтэй болдог. Энэ бол жишээ. Гэтэл эрхэм гишүүд юу бодож, сэтгэхээрээ ийм амралт сэдсэн нь тун ойлгомжгүй. Ядаж байхад Монгол Улс эдийн засгийн хямралд нэрвэгдчихсэн. Амралтын энэ өдрүүдэд ч юмны үнэ өссөөр л байгаа. Ам.долларын ханш өсөлтийнхөө рекордыг эвдчихсэн талаар хэвлэлүүд мэдээлж байна. Мах, талх... гээд өсөөгүй юм ч алга.

Яг үнэндээ ийм урт амралт эдлэх нь хууль баталсан 76-д бол аятайхан л байгаа. Амьтны хэл амны бай бололгүй, ая тааваараа хөдөө хэцээр хэсч явах шиг жаргал тэдэнд үгүй. Чуулганы завсарлагаар амарч зугаалах нь тэдний хувьд хүнд байдаг байсан нь нууц биш. Одоо нийтээр нь амрааж байгаад дунд нь ороод явчихаж буй. Энэ бол өчүүхэн эрх ашиг.

Энэ амралтын өдрүүдийн оронд ажиллацгааж, эдийн засагт бага ч атугай нэмэр болж байсан бол ард түмэн бидэнд л хэрэгтэй байлаа. Өнөөдөр Ерөнхий сайд “Алтаргана”-д оролцохоор Хэнтийн Дадал явна гэхээс өөр улстөрчидтэй холбоотой тоймтой мэдээлэл алга. Бас л амарч зугаацахын нэг хэлбэр.

Чухамдаа улс орны эдийн засгийн хямрал УИХ-ын 76 болоод Ерөнхий сайдад огт нөлөөлөхгүй. Үр дүн нь энгийн бидний нуруун дээр л ачаа болж  үлддэг билээ.