С.САРУУЛ

Нийслэлийн шийдвэр гүйцэтгэх албанаас өнгөрсөн сард үл хөдлөх хөрөнгийн албадан дуудлага худалдаа зарлажээ.

Дуудлага худалдаанд орсон  гурван өрөө  бүхий хоёр орон сууцыг худалдаж авахаар дэнчингийн мөнгөө тушаасан иргэний 23 сая төгрөгийг хууль бусаар улсын орлого болгох шийдвэр гаргасан байна. Тухайн үед дуудлагаар худалдах байрнуудынхаа хаягаас өөр тодорхой мэдээлэл өгөлгүй  хүсэлт гаргасан иргэдийг үл хөдлөх хөрөнгийн албадан дуудлага худалдаанд оролцогчдын эрх үүрэг гэсэн гэрээнд гарын үсэг зуруулжээ.

Байр худалдаж авсан иргэд 14 хоногийн дотор урьдчилгаа болох байрны үнийн дүнгийн 10 хувийг тушаасан байна. Дараа нь иргэд дуудлага худалдаанд орсон байрыг судалж үзтэл орон сууцны чанар муу, барилгын стандарт хангаагүй, хот, тосгоны төлөвлөлт, барилгажилтын норм дүрэм зөрчсөн, улсын комисс хүлээж аваагүй, үл хөдлөх хөрөнгийн бүртгэлийн газар бүртгэгдээгүй байжээ. Тиймээс орон сууцыг худалдаж авахаас татгалзаж, дэнчингийн мөнгөө буцааж авах гэтэл Нийслэлийн шийдвэр гүйцэтгэх албанаас улсын орлого болгоно гэсэн хариу өгчээ. Тус албанаас ингэж улсын орлого болгож байгааг Иргэний хууль болон Шүүхийн шийдвэр гүйцэтгэх тухай хуульд заасны дагуу гэж тайлбарласан байна. Гэтэл дээрх хоёр хуулийн заалтуудад нь “дэнчинд тушаасан мөнгийг улсын орлого болгоно, буцаан олгохгүй” гэсэн үндэслэл алга байгаа аж.

Иргэд урьдчилгаанд төлсөн мөнгөө буцаан авахаар гомдол гаргахад тус газрын зарим шийдвэр гүйцэтгэгч хүмүүсийг хэл амаар доромжилж, хууль зөрчсөн хариу өгчээ. Шүүхийн шийдвэр гүйцэтгэх албанаас  урьдчилгаа мөнгөө буцаан авахаар гомдол гаргасан хэд хэдэн иргэн байгаа бөгөөд тэд хууль хяналтын байгууллагад хандах гэнэ.