Стандартчилал, хэмжил зүйн газар нь APLAC (Ази Номхон Далайн лаборатори итгэмжлэлийн хамтын ажиллагааны байгуулага)-т жинхэнэ гишүүнээр 2004 онд, ILAC (Олон улсын лаборатори итгэмжлэлийн хамтын ажиллагааны байгуулага)-д гишүүн байгууллагаар 2007 онд тус тус  элссэн. 2012 оны зургадугаар сарын 7-нд нэгдсэн APLAC-ын олон талын хүрээнд харилцан хүлээн зөвшөөрөх хэлэлцээр (ХХЗХ)-ээр уламжлан, ILAC-ын ХХЗХ-т нэгдсэн. Стандартчилал, хэмжил зүйн газар нь ILAC-ын ХХЗХ-ийн тэмдэг (ILAC MRA mark)-ийг үндэсний итгэмжлэлийн таних тэмдэгтэй хослуулан хэрэглэх зөвшөөрлийн гэрээг 2014 оны дөрөвдүгээр сарын 04-нд ILAC-ын дарга ноён Петер Ангертай байгууллаа. Гэрээний зорилго нь итгэмжлэгдсэн лабораториудад ILAC MRA тэмдгийг үндэсний итгэмжлэлийн таних тэмдэгтэй хослуулан  хэрэглэх дагалдах гэрээ байгуулан (sub-licence) хэрэглэх явдал юм.

Хэрэв итгэмжлэгдсэн лабораториуд нь хосолсон тэмдгийг хэрэглэхийг хүсч байвал хэрхэн хэрэглэх талаар Стандартчилал, хэмжил зүйн газартай гэрээ байгуулах ёстой. Эрхийг эзэмшихийг хүссэн лаборатори нь өөрийн хосолсон  MRA тэмдгийг MNAS-д өргөн барих шаардлагатай. MNAS-аас бичгэн хэлбэрийн зөвшөөрөл ирэхээс өмнө түүнийг хэрэглэхгүй. Итгэмжлэгдсэн сорилт, шалгалт тохируулгын лабораториуд бараа бүтээгдэхүүнд сорилт, хэмжил хийсэн тайлан, гэрчилгээн дээр хэрэглэх боломжтой. Үүний дүнд ILAC-ын ХХЗХ-т гарын үсэг зурсан 70 орны 85 итгэмжлэлийн байгууллагын хүрээнд Монгол Улсын итгэмжлэгдсэн лабораториудын үр дүнг хүлээн зөвшөөрөх таатай боломж бүрдэх болно. Үндэсний лабораториуд ILAC-ын ХХЗХ-ийн тэмдгийг үндэсний итгэмжлэлийн таних тэмдгийн хамт хослуулан хэрэглэх нь гадаад, дотоодод итгэмжлэлийн байгууллага болон өөрийн лабораторийг сурталчилах, олон улсын хэмжээнд үр дүнг нь хүлээн зөвшөөрснийг илтгэх нэр хүндтэй алхам болно. Эзэмшигч лаборатори нь “Лабораторийн ХХЗХ-ийн хосолсон тэмдэг”-ийг үйл ажиллагаа, зар сурталчилгаа, цахим хуудаст итгэмжлэгдсэн сорилтын тайлан, шалгалт тохируулгын гэрчилгээ, албан бичгийн хэвлэмэл маягт, иш таталт дээр хэрэглэх ба нэрийн хуудас дээр тавихгүй.