Б.ЭНХ

Баянзүрх дүүргийн 11 дүгээр хороо “Ургах наран” хорооллын зүүн хэсэгт төмрийн худалдаа эрхэлдэг “Дөл түшиг” компани хууль бусаар ашиг олж байсныг ШӨХТГ-аас тогтоожээ. Барилгын арматур, катенг төмөр худалдаалж, хаягдал төмөр авдаг БНХАУ-ын хөрөнгө оруулалттай “Дөл түшиг” компаниас өнгөрсөн баасан гаригт “Дега-Монгол” компанийн залуус катенг төмөр худалдан авсан байна. Тэд бүтээгдэхүүнээ зах зээлийн үнээс хамгийн хямд, найдвартай гэж итгүүлэн төлбөрөө түрүүлж дансаар хийхийг шаарджээ. Ингээд төлбөрөө авсныхаа дараа ирж ав гэснээр нь очсон байна. “Дөл түшиг” компани катенг төмрөө боож багцлан кг-аар нь ангилан тээвэрлэхэд бэлэн болгож зардаг ажээ. Тэд найдвартай эсэхийг нь шалгахын тулд эхний ээлжинд 11 тонн төмөр худалдан авахаар тохиролцжээ. Төлбөрөө төлсөн иргэд бараагаа бүрэн эсэхийг лавлаж хэмжиж өгөхийг хүсэхэд хятад эзэд нь эсэргүүцэж “Ийм бага хэмжээтэй төмөр жинлэхгүй. Манайд ямар нэгэн маапаан байхгүй” гэж монгол залуусыг хэл амаар доромжилжээ. Тэднийг ийн маргалдах үед монголчууд барилгын төмрийг их хэмжээгээр худалдан авсаар байжээ. “Дега-Монгол” компанийн захирал Д.Отгонбаатар залуусынхаа хамтаар хот руу орж нэгэн газарт хэмжүүлэхэд тонн тутмаас 80 кг төмөр дутжээ. Мөнгөн дүнгээр бодоход 800 мянган төгрөгөөр хохирсон байж. Хятадын компани нэг тонн төмрийг дунджаар 1.2 сая төгрөгөөр худалдаалжээ. Хохирсон залуус өнгөрсөн даваа гаригт ШӨХТГ-т хандсанаар албаны хүмүүс “Дөл түшиг” компанид шалгалт оруулсан байна. Энэ үеэр мөн л дээрх зөрчил илэрч тонн тутмаас 60-80 кг төмөр дутаж байжээ. Дутаасан төмрийг тооцоолж үзвэл тус компани 10 тонн тутмаас нэг тонн төмөр дутаадаг байсан болохыг шалгалтын багийнхан хэлж байв. Гурван давхар барилгаар бодвол  нийт төмрийнх нь 10 хувийг дутааж илүү ашиг олдог гэсэн үг. Харин компанийнхан үүнийгээ төмрийн хорогдол гэж тайлбарласан байна. Барилгын мэргэжлийн хүмүүсийн хэлж буйгаар хамгийн хорогдолгүй бүтээгдэхүүн төмөр гэдгийг хэлж байгаа юм. Тиймээс хятад компанийн тайлбар үндэслэлгүй төдийгүй, Монгол Улсын нутаг дэвсгэрт үйл ажиллагаа явуулахдаа иргэд, аж ахуй нэгжийг хохироож байгааг буруушааж байлаа. Энэ тухайд компанийн менежер монгол эмэгтэй “Зөвхөн манайх ч биш, төмрийн худалдаа эрхэлдэг бүх компани ийм маягаар ажилладаг” гэжээ. Ямартаа ч “Дега-Монгол” компанийн хохирлыг барагдуулахаа амласан байна.