Т.САЙХАН

Бид өдөр бүхэн л улс төрчдийн талаар ярьж, зөв бурууг нь шүүн тунгааж, өөр өөрсдийн дүгнэлтээ хийж байна.  Энэ орон зайд ч өдөр бүхэн  л халуухан үйл явдал өрнөдөг. Хэн нэгнийгээ гүтгэж, доромжилж, оймс гутлаа шидэлцэж, элдэв хараалын үг хэлэлцэж, сэм найралцаж, хор найруулж байна.  Гэхдээ энэ удаа улс төрчдийг орхиод урлагийнхны руу хэдэн үг шидье гэж бодлоо.  Өчигдөр орой гэртээ очоод телевиз асааж үзлээ. Дуучин Б.Баярцэцэг, залуу дуучин Д.Зоригт, А.Хишигдалай нар “Siesta”-гийн реклам гээд бүрэн хэмжээний дуу хийчихжээ. “Siesta siesta siesta” гээд л орилоод байна.  Энэ үнэхээр зохимжгүй санагдлаа. Хичнээн уран бүтээлчдэд мөнгөний асуудал байсан ч, их мөнгө өгье гэсэн ч бүрэн хэмжээний клиптэй дуу хийж нэг бүтээгдэхүүнийг сурталчлах хэмжээний өөрийгөө үнэлнэ гэдэг харамсмаар санагдана. Нэг үе байгууллага бүхэн өөрийн сүлд дуу хийж уран бүтээлчдээр дуулуулж, тухайн үедээ шүүмжлэл дагуулж байлаа.  Харин нэг уут самар, ургамлын тосны тухай дуу хийгээд түүнийгээ ард түмэнд хүргэнэ гэдэг арай л хэтэрнэ ээ. Дуучин Д.Зоригт, А.Хишигдалай нар урлагийн тогоонд дөнгөж орсон, одоо л залууст хүлээн зөвшөөрөгдөж эхэлж байна.  Гэтэл урлагийг ийм амраар төсөөлж “наашаа ингээч тэгээч” гэсэн бүхэнд нь очоод дуулж тоглож байгааг нь харахад их л хөнгөн сэтгээд байна уу гэж харж байна.  Урлаг гэдэг нэр хүндтэй, хариуцлагатай салбар.  Гэтэл уран бүтээлийг реклам болгон,хөлдөө чирч,  өөрсдийнхөө нэр хүндийг ч  навс унагааж байгаа нь харамсмаар юм даа. Уут самар, ургамлын тосны тухай дуу хийж байгаа юм чинь удахгүй урлагийнхан юуны ч тухай дуулахаас юу ч хийхээс буцахгүй болох нь ээ.

Эх сурвалж:www.polit.mn