М.Цэцэг

Ази-Европын Парламентын Түншлэл АЕПТ-ийн есдүгээр уулзалт “Ази-Европын Парламентын Түншлэлийн АСЕМ дахь үүрэг оролцоо” сэдвээр болж өндөрлөлөө.

Уулзалтад Австрали, Австри, Бельги, БНАЛАУ, БНСУ, БНХАУ, Болгар, Вьетнам, Дани, ИБУИНВУ, Индонез, Испани, Итали, Казахстан, Камбож, Кипр, Монгол, Норвеги, ОХУ, Пакистан, Польш, Сингапур, Тайланд, Унгар, Филиппин, Финланд, Франц, Хорват, Швед, Швейцарь, Энэтхэг, Япон зэрэг АСЕМ-ын гишүүн улсын парламентын гишүүд болон Европын парламентын төлөөлөгчид оролцлоо. Мөн Ази-Европын Сангийн төлөөлөгчид зохион байгуулагч Парламентын зочноор тус уулзалтад оролцов.

Хурлаас ирэх долдугаар сард манай улсад болох АСЕМ-ын уулзалтын үеэр танилцуулах тунхаглалыг батлав. Тунхаглалын 14 дүгээр зүйлд “АЕПТ-ийн парламентчид БНАСАУ-аас 2016 оны нэгдүгээр сарын 6-ны өдөр хийсэн цөмийн туршилт, мөн оны хоёрдугаар сарын 7-ны өдөр баллистик пуужингийн технологи ашиглан хөөрөгсөн, мөн хүний эрхийг зөрчиж, хүн хулгайлсан зэрэг нь НҮБ-ын Аюулгүйн Зөвлөлийн холбогдох тогтоолуудыг ноцтой зөрчиж байгаагийн зэрэгцээ Зүүн Хойд Ази болон бусад тивд энх тайван, тогтвортой байдалд заналхийлж байгааг эрс буруушаав. Тэд БНАСАУ-аас НҮБ-ын Аюулгүй Зөвлөлийн холбогдох тогтоолуудыг хэрэгжүүлж, цөмийн бүх төрлийн хөтөлбөр болон баллистик пуужингийн хөтөлбөрөөсөө эргэлт буцалтгүйгээр бүрэн татгалзахыг шаардав. Түүнчлэн БНАСАУ-ын сүүлийн үеийн өдөөн хатгасан үйлдлүүдийн улмаас буй болсон хурцадмал байдлыг намжаах, мөн Солонгосын хойгийг цөмийн зэвсгээс ангид байлгах, Зургаан талт яриа хэлэлцээг  үр нөлөөтэйгээр сэргээх зайлшгүй шаардлага тулгараад буйг парламентчид цохон тэмдэглэв” гэж заажээ.

Энэ заалтын талаар төгсгөлийн нэгдсэн хуралдааны үеэр Хятадын төлөөлөгчид өөр саналтай байгаагаа илэрхийлсэн юм. Гэвч тунхаглалыг өмнө нь төлөөлөгчид санал нэгтэй дэмжсэн учтр өөрчлөх боломжгүй байв. Иймд Хятадын талаас тавьсан саналыг долдугаар сард болох дээд хэмжээний уулзалтад  танилцуулахаар болсон юм.

Төлөөлөгчид  АЕПТ-ийн парламентчид төлөөлөгчдийг халуун дотнооор хүлээн авсанд Монгол Улсын Их Хуралд талархал илэрхийллээ. АЕПТ-ийн дараагийн уулзалтыг 2018 онд Европт зохион байгуулах боломжтой гэж үзсэн юм.

Эх сурвалж: www.polit.mn