Т.ДАЛАЙ

УИХ-ын гишүүн Х.Баттулгын  эзэмшлийн  "Баялагийн хувь", "Түмэн хишигтэн" гэх хоёр компанид хийж байгаа шалгалтын явцын талаар мэдээлэл хийсэн.  Цагдаагийн ерөнхий газрын хэвлэл мэдээллийн албаны дарга Б.Баатархүү “Нэгжлэг хийхдээ прокурорын зөвшөөрлөө танилцуулж, шалгалтын ажиллагаанд саад хийхгүй байхыг аж ахуйн нэгж, байгууллагынханд сануулсан. Гэвч шалгалтын ажиллагаанд хөндлөнгөөс санаатайгаар саад учруулсан учраас тусгай албаныхныг дуудахаас аргагүй нөхцөл байдал үүссэн” гэлээ. Мөн санаатайгаар саад хийсэн нэр бүхий хүмүүсийг хуулийн дагуу шалгана гэдгийг энэ үеэр мэдэгдсэн юм.  Мөн энэ хэвлэлийн хурлын үеэр УИХ-ын гишүүн Х.Баттулгын хэвлэлийн төлөөлөгч Ж.Цэсэн ирсэн байлаа. Тэрээр “Цагдаагийн байгууллагынхан өөрсдөө ингэж худал мэдээлэл өгч болохгүй. Нэгжлэг эхлэхээс л би Баянгол зочид буудалд байсан. Цагдаагийн байгууллагынхны өөдөөс манай байгууллагынхан ямар ч эсэргүүцэл үзүүлээгүй. Цагдаагийн байгууллагынхан анх ирж, прокурорын зөвшөөрөл танилцуулахдаа л тусгай ажиллагааны албаныхантай ирсэн” гэж мэдээллээ.

Эх сурвалж:www.polit.mn