М.ГАН

Ази, Европын парламентын түншлэлийн есдүгээр уулзалт Төрийн ордонд эхэллээ. Энэ нь Монгол Улсын Их Хурал, Ази Европын Дээд түвшний 11 дүгээр уулзалт /АСЕМ/-ийн хүрээнд болж буй анхны хурал юм. Нэгдсэн хуралдааныг УИХ-ын дарга З.Энхболд даргалав. Энэ удаагийн уулзалт “Ази-Европын Парламентын Түншлэлийн АСЕМ дахь үүрэг оролцоо” гэсэн ерөнхий сэдвийн дор болж байна.

Хурлын нээлтэд Ерөнхийлөгч Ц.Элбэгдорж,  Итали улсын парламентын  Сенатын ерөнхийлөгч Пьетро Грассо болон бусад орны парламентын гишүүд оролцлоо. Энэ уулзалтаар терроризм, уур амьсгалын өөрчлөлт, тогтвортой хөгжлийн 2030 он хүртэлх хөтөлбөр, гамшгаас сэргийлэх менежмент, эрчим хүчний аюулгүй байдал, дүрвэгсдийн асуудал зэрэг олон чухал асуудлыг хамтдаа  хэлэлцэх юм.

Ази, Европын Парламентын Түншлэлийн есдүгээр уулзалтад түнш  32 орон болон Европын парламентаас 170 төлөөлөгч оролцож байна.  Төлөөлөгчид өчигдөр бэлтгэл хорооны хурал, мөн баримт бичгийн хорооны хурлаа хийж, уулзалтаас гарах тунхаглалаа  хэлэлцсэн юм.

Одоо Төрийн ордонд “Үр дүнтэй олон талт харилцаа, хамтын ажиллагаа”, “Ирээдүйн төлөөх түншлэл” гэсэн сэдвээр хоёр салбар хуралдаан болж байна.

Эх сурвалж: www.polit.mn