Монголын ардчиллын анхны удирдагч С.Зориг агсан бидний дунд хэрэв  байсан бол өчигдөр 54 нас хүрэх байлаа. Түүний төрсөн  дөрөвдүгээр сарын 20-ны энэ өдөр  гэр бүл,хамтран зүтгэгч  журмын нөхөд, монголчууд хөшөөнд нь цэцэг өргөж үйл хэргийг нь дурсдаг уламжлалтай. Харин энэ удаа  тус өдрийг огт өөрөөр угтав. Цаг хугацааны хувьд аваад үзвэл, сонгууль дөхсөн онцлог үе,  Монголын ард түмэнд  ардчилал, эрх чөлөөг авчирч өгсөн түүний хамтран зүтгэгчид  төрийн жолоо атгасан торгон үе. Гэтэл  эхнэрийг нь шоронд хорьж, эрхийг нь дээд зэргээр зөрчсөн гэсэн мэдээлэлтэй хамт  өөрсдөө цэцэг тэврэн хөшөөнийх нь өмнө  инээлдэж яваа ийм л гашуун дүр зураг харагдав. Эхнэр Б.Булган нь энэ өдрүүдийг  нөхрийнхөө монголчуудад авчирч өгсөн ардчилал, хүний эрх, эрх чөлөөний өчүүхэн хэсгийг ч эдэлж чадахгүй шоронгийн дарамтад  өнгөрүүлж байгаа. Тэр анх гэрч байсан, дараа нь сэжигтэнд тооцох болсон, одоо яллагдагч болгосон гэдэг. Түүнийг  24 цагийн  гэрэлтэй өрөөнд  хорьсон, эргэлт оруулдаггүй, өмгөөлөгчийг уулзуулдаггүйг  ээж нь хэвлэлд ярьсныг холбогдох байгууллагууд үгүйсгэдэг. Хүний эрхийн комисс “Эрх нь зөрчигдөөгүй, зөрчигдсөн байх магадлалтай” хэмээн бөөрөнхийлдөг. Хамгийн сүүлд  Ц.Оюунгэрэл гишүүн хорих ангийн хонгилд суулт хийж байж уулзахдаа дөрвөн талдаа өдрийн гэрэлтэй, чөлөөтэй унтаж, тухтай бие засч чаддаггүй дарамттай нөхцөлд, таван сар болоход хувцсыг нь нэг ч удаа солиулалгүй хорьж   буйг нүдээр харснаа хэлснээр Улсын ерөнхий прокурорын газраас шалгахаар болсон.Хорих 461 дүгээр ангид хоригдож буй хүмүүсээс илт гундуу, дарамттай нөхцөлд хоригдож буй  Б.Булган ханийнхаа хамтран зүтгэгч журмын нөхөд, улстөрчдөд хандаж  “Намайг битгий золиослооч” гэдэг үгийг л дамжуулсан байна лээ. С.Зориг агсны мэндэлсэн  дөрөвдүгээр сарын 20-ны  өдрийг ийм байдлаар угтаж бас үдлээ.    

Эх сурвалж: “Зууны мэдээ” сонин