Т.САЙХАН

Саяхан Архангай аймагт тун ч өвөрмөц дэглэлттэй нэгэн инээдмийн жүжиг тавигдаад өнгөрлөө.  “Мөнх тэнгэрийн оньс” нэртэй “компани” байгуулж Чингис хааныг тодруулаад амжсан нэгэн “жүжигчин” очиж, гол  дүрд нь тоглоод нутгийн иргэдийг мунхруулаад амжжээ.  Энэ нь И.Мөнхсаруул гэх бөө эмэгтэй юм. Тэрээр “Булган уулыг тахина” гэсэн зар тарааж, уул усаа хүндэтгэн хайрладаг ард түмний сэтгэлийг ашиглаад иржээ.   “Булган уулыг тахих ёслолд есөн төрлийн идээ ундаа авдар зэрэгтэн хэрэг болно хэмээн түүнийг зарж, бага зэргийн бизнесийн үйл ажиллагаа ч болоод өнгөрсөн байна.  Мөн хамгийн сонирхолтой нь жүжгийнхээ дараа аймгийн Засаг дарга Д.Бат-Эрдэнэ дэмжсэн мэтээр ярьсан нь зарим хүмүүст буруу сэтгэгдэл төрүүлж байна.  Цахим ертөнцөд асуудал тогооноосоо хальж иргэдийг талцуулах, сүүлдээ бүр улс төрийн зорилготой мэт сэтгэгдэл төрүүлж эхэллээ.  “Засаг дарга Д.Бат-Эрдэнийг Богд хаанаар тодруулахаар болсон”, “Тамгын газраас санхүүгийн туслалцаа үзүүлсэн” гэх зэргээр ярьж байна. Тэгвэл  энэ талаар Архангай аймгийн Засаг дарга Д.Бат-Эрдэнээс тодруулахад “Булган уулыг тахихаар ирсэн И.Мөнхсаруул гэгч эмэгтэйд санхүүгийн дэмжлэг өгч өөрөө богд хаанаар өргөмжлөгдөх нь битгий хэл уулзаж үг сольж ч үзээгүй” гэсэн юм.  Тэрээр тухайн өдөр Хотонт суманд ажиллаад Улаанбаатар хот руу албан ажлаар явсан байна. Гэсэн ч түүний талаар иргэд буруугаар ойлгож ард иргэдээ мунхруулсан мэтээр ярьж байгаа юм. Мөн тэрээр Засаг даргын захирамжаар ЗДТГ-аас нэг ч төгрөг гараагүй, иргэн И.Мөнхсаруулын үйл ажиллагаанд тамгын газрын нэг ч албан тушаалтан оролцоогүй гэдгийг онцлон хэллээ. Харин ч И.Мөнхсаруулын “Булган уул тахих “зан үйлийг” зохицуулуулахыг аймгийн Тусгай хамгаалалтын газарт үүрэг болгосон байна.  Ийм л нэгэн инээдмийн жүжгээс болж, Архангай даяар нэгнийгээ хардаж сэрдэж, Аймгийн Засаг дарга нь хүртэл энэхүү жүжигт хэлмэгдээд амжжээ.

Эх сурвалж:www.polit.mn