Т.САЙХАН

Хөдөлмөрийн яам, Монголын үсчин гоо сайханчдын холбоо, Ражив Гандийн нэрэмжит Үйлдвэр урлалын Политехникийн коллеж хамтран “Алтан хайч-2016” улсын уралдааныг амжилттай зохион байгууллаа. Үсчин гоо сайханч бэлтгэдэг нийслэлийн гурван сургуулиас гадна Архангай, Дархан-Уул, Говь-Алтай аймаг зэрэг хөдөө орон нутгийн 130 гаруй оюутнууд энэхүү тэмцээнд өрсөлдөв. Энэ жил  Ражив Гандийн нэрэмжит Үйлдвэрлэл урлалын политехник коллежийн 50 жилийн ой тохиож байгаа бөгөөд энэхүү ​тэмцээнийг тус сургуулийн нэрэмжит болгон зохион байгуулж байна. Оролцогчид эхний гараандаа эрэгтэй креатив засалт, эмэгтэй урт үсний самналт, химийн хагалгаа, дамар ороолт, хумсны урлал бүтээл гэсэн төрөлд өрсөлдөж байгаа юм.  Харин хоёрдугаар гараандаа эрэгтэй чөлөөт засалт, эмэгтэй креатив засалт, тайралт уран сэтгэмжийн нүүр будалт зэрэг төрлөөр ур чадвараа сорилоо.

ХХАА- н сайд Г.Баярсайхан: “Алтан хайч” тэмцээнд тэргүүлсэн залуусаа дэлхийн ур чадварын олимпод явуулна

-Монгол орны хэмжээнд нийт 87  МСҮТ үсчин гоо сайхны чиглэлээр мэргэжилтэн бэлтгэж байна. Энд залуус маань өөрөө ажилчин болохын зэрэгцээ бусдыг ажлын байраар хангаж байдаг.  Энэхүү “Алтан хайч” тэмцээнд тэргүүлсэн залуусаа бид дэлхийн ур чадварын олимпод явуулна. Ур чадварын тэмцээнд оролцсоноор монголчууд хөдөлмөрийн салбарт олон улсад хаана яваагаа мэдэж тодорхойлох боломжтой болно..

Тэмцээний ерөнхий шүүгч Ц.Цогзолмаа: “Алтан хайч”-ыг 14 дахь жилдээ зохион байгуулж байна

-Би энэхүү тэмцээнийг 14 жил хамтран зохион байгуулж байна. Энэ он жилүүдэд бид ямар төвшинд яваагаа энэхүү тэмцээнээр мэддэг байлаа.  14 жилийн дараа эргээд харахад Монголын үсчин гоо сайханчид маань ихэд хөгжиж чаджээ.  Тив дэлхийн олон тэмцээнээс шагнал авч монголынхоо нэрийг гаргаж чадаж байна. Энэ тэмцээнээс гарсан залуус дэлхийд өрсөлдөх чадвартай болно. Манай үсчин гоо сайхны салонуудад мэргэжилтэй ажилтнууд их хэрэгтэй байна. Мөн би одоогоос 44 жилийн өмнө Ражив Гандийн нэрэмжит Үйлдвэрлэл урлалын политехник коллежийг төгсөж байлаа. Өнөөдөр бас сургуулийн маань 50 жилийн ой тохиож байна. Үе үеийн төгсөгч үсчингүүддээ баяр мэнд хүргэе.

“Хос Шагай” салоны мастер үсчин Н.Алтаншагай:

-Олон улсын зэрэглэлтэй тэмцээнүүдийг шүүх эрхтэй. Эрэгтэй креатив засалтын төрлийг шүүлээ. Саяхан болж өнгөрсөн дэлхийн аваргын төрлөөр энэ төрөлд оролцож манай баг амжилт үзүүллээ.  Ер нь  эрэгтэй үсчний баг маань дэлхийн болон олон улсын тэмцээнүүдэд их сайн оролцдог. 

Энэ удаагийн “Алтан хайч” улсын уралдаанд амжилттай оролцсон сургуульд шилдэг гранпри цом, шилдэг суралцагчид Хөдөлмөрийн яамны Сайдын нэрэмжит болор цом, алтан хайч,  10 төрөл тус бүрд эхний дөрвөн байранд өргөмжлөл, медаль, ивээн тэтгэгч байгууллагуудын мэргэжлийн багаж, бүтээгдэхүүнээр шагнав. Шилдэг суралцагчаар Хөвсгөл аймгийн суралцагч О.Өнөржаргал шалгарч Сайдын нэрэмжит шагналт хүртсэн бол, шилдэг сургуулиар Үйлдвэрлэл  Урлалын Политехник коллеж шалгарлаа.

Эх сурвалж:www.polit.mn