Г.ГАНЧИМЭГ

Энэ тухай өнөөдөр Монголын үсчин, гоо засалчдын мэргэжлийн холбооноос мэдээлэл хийлээ

Монголын үсчин гоо сайханчдын шинэ үе хэр чадваржиж байгаагаа лхагва гаригт Аса циркэд болох “Алтан хайч” улсын уралдаанаараа харуулна. Энэ нь үсчин, гоо засалчийн мэргэжлээр суралцаж буй оюутан залууст дэлхийн ур чадварын олимпт оролцох боломжоо ахиулах, шийдвэрлэх томоохон сорил болдогоороо онцлогтой юм. Тиймээс үсчин, гоо заслын төрлүүдээр өрсөлдөх оролцогчдын даалгаврыг дэлхийн ур чадварын тэмцээнийхтэй дүйцүүлэн бэлтгэдэг аж. 14 дэх жилдээ тасралтгүй зохион байгуулж буй уралдаанд мэргэжлийн сургуулийн 140 гаруй оюутан оролцоно. Тэд гоо заслын гурав, үс засалтын долоон төрлөөр ур чадвараа уралдуулах юм.

Энэ удаагийн тэмцээнийг Хөдөлмөрийн яам, Үйлдвэрлэл урлалын политекник коллеж, Үсчин гоо засалчдын мэргэжлийн холбоо  хамтран зохион байгуулж буй юм. “Ган холдинг” групп ерөнхий ивээн тэтгэгчээр, “Монкрем” компани, “Гоо хатад”, “Great beauty Mongolia”, AMU зэрэг үсчин, гоо заслын бүтээгдэхүүн нийлүүлэгч үйлчилгээний төвүүд мөн дэмжин хамтран ажиллаж байна.

Эх сурвалж www.polit.mn