Т.САЙХАН

Монголын Үндэсний музейн захиргаанаас Нийслэлийн Засаг даргын Тамгын газар, Улаанбаатар хотын Цагдаагийн газарт музейн урд  хэсэгт  жагсаал, цуглаан зохион байгуулах зөвшөөрөл олгохгүй байх хүсэлт ирүүлжээ.  Уг асуудлыг нийслэлийн Удирдлагын зөвлөлийн хуралдаанаар хэлэлцэн хэлмэгдэгсдийн хөшөөний өмнө жагсаал цуглаан хийлгэхгүй байхаар шийдвэрлэлээ. Монголын Үндэсний музейн захирал Д.Сүхбаатар “Монголын Үндэсний музей нь 55 мянга гаруй үзмэр, жилд 80 гаруй мянган үзэгчтэй. Сүүлийн жилүүдэд манай музейн урд талбайд иргэд жагсаал, цуглаан зохион байгуулж гэр барьж олон  хонох тохиолдол эрс нэмэгдсэн. Жагсагчид тухайн орчны эд хогшил, хөшөөг эвдэж, бие засах, гал түлэх, хоол хийх, хог хаях зэргээр бохирдуулдаг. Музейгээр үйлчлүүлж буй иргэд, ялангуяа бага ангийн сурагчдын багш, эцэг эхчүүд музей үзэх боломжоор хангах, аюулгүй байдлыг хангаж өгөх гомдол, хүсэлтийг удаа дараа ирүүлж байна” гэсэн юм.  Нийслэлийн удирдлагын зөвлөлийн хуралдааны шийдвэрийн Нийслэлийн Засаг дарга Э.Бат-Үүл захирамж гаргалаа. Захирамжаар  Монголын Үндэсний музейн үзмэрийг хамгаалах, үйлчлүүлж буй гадад, дотоод иргэд, олон нийтийн аюулгүй байдал, тав тухтай үйлчлүүлэх нөхцөл, байгууллагын хэвийн үйл ажиллагааг хангуулах зорилгоор хэлмэгдэгсдэд зориулсан дурсгалын хөшөө орчимд жагсаал цуглаан зохион байгуулах зөвшөөрөл олгохгүй байхыг Чингэлтэй дүүргийн Засаг дарга Д.Ганболдод үүрэг болгосон байна.

Эх сурвалж:www.polit.mn