Т.САЙХАН

Нийтийн тээврийнхэн сүүлийн үед нэгдүгээр улирлын санхүүжилтээ авахаар эсэргүүцэл зарлаж байгаа. Тэд нийслэлийн удирдлагуудаас  санхүүжилтээ нэхэн лоозон хатган үйлчилгээнд оролцох болсон. Уг асуудалтай холбогдуулан өнөөдөр  /2016.04.12/ нийслэлийн Засаг даргын орлогч Н.Гантөмөр Тээврийн газрын дарга Ч.Энхбат нар мэдээлэл хийлээ.  Нийтийн тээврийн үйлчилгээнд ажиллаж байгаа шалгагч нарын үйл ажиллагаа болон орлого төвлөрүүлэх асуудлыг Улаанбаатар смарт карт компани хариуцах заалт байсан тул нийслэлийн нийтийн тээврийн газраас гурван талт гэрээг хоёр талт хэлбэрээр байгуулахаар болжээ.  Ингээд 2016 оны дөрөвдүгээр сарын 11-ний өдрөөс нийтийн тээврийн үйлчилгээний аж ахуйн нэгж, байгууллагууд нийслэлийн Тээврийн газартай гэрээ байгуулж эхлээд байгаа бөгөөд гэрээ байгуулсан аж ахуйн нэгж, байгууллагын санхүүжилтийг олгож эхэлжээ. Одоогийн байдлаар 2016 оны эхний гурван сарын нөхөн олговорт гүйцэтгэлийн дагуу 7.924.351.800 төгрөгийн нөхөн олговрыг бүрэн олгосон байна. Харин машин цагийн зардлын эхний хоёр  сарын санхүүжилт 8.874.248.891 төгрөг олгохоос 50 хувь буюу дөрвөн тэрбум гаруй төгрөгийг олгожээ.

Эх сурвалж:www.polit.mn