Б.ЗАЯА

ШӨХТГ-ын дарга асан О.Магнай өчигдөр мэдээлэл хийв. Т.Аюурсайхан ШӨХТГ-ыг удирдаж байхдаа авлига авч “НИК” компанид оноосон 4.9 тэрбум төгрөгийн торгуулийг хүчингүй болгосон гэх мэдээллийг няцаав.

Тэрээр “ШӨХТГ-ыг удирдаж байх үед шатахууны хомсдлыг зохиомлоор үүсгэж хэрэглэгчдийг залилсан “НИК” компанид ШӨХТГ-аас 2012 оны арванхоёрдугаар сард 4.9 тэрбум төгрөгийн торгууль тавьсан. Энэ асуудлаар шүүхийн байгууллагад хандсан ч манайх ялалт байгуулсан нь үнэн. Шүүхийн эцсийн шийдвэр торгуулиа дахин тавьж тооц гэсэн байсан. Энэ асуудлыг “НИК”-ийн удирдлагад удаа дараа тавьсан ч нэлээн хойрго хандсан. Гэвч Т.Аюурсайханы үед ШӨХТГ гурван шатны шүүхэд “НИК” компанид ялагдал хүлээсэн. Үнэндээ Т.Аюурсайхан “НИК” компанитай үгсэн хуйвалдаж, торгууль тавьсан Ж.Очирсүх гэдэг байцаагчийг удаа дараа дарамталж, ажлаас ор үндэслэлгүй халсан. Зөвхөн энэ байцаагчийг ч халаад зогсоогүй ШӨХТГ-ын нийт ажилтны 90 хувийг халж, сольсон байдаг. Учир нь “НИК” компани нь Ерөнхийлөгч асан Н.Багабандийн сайн найз Ш.Отгонбилэг агсны гэр бүлийн бизнес. Т.Аюурсайхан бол Ерөнхийлөгч асан Н.Багабандийн туслах. Тэд бол нэг түрийвчтэй, олигархи бүлэглэл. Тиймээс намайг гүтгээд байгаа хүчингүй болгосон асуудлыг Т.Аюурсайхан өөрөө гардаж хийсэн. Намайг яаж ажилласныг нэг намын нөхөр Т.Аюурсайхан дүгнэхгүй. Иймд нэр хүндэд халдаж байгаа түүнийг шүүхэд өгнө” гэлээ.

Эх сурвалж: “Зууны мэдээ” сонин