Ц.БАЯР

Таван хувийн хүүтэй ипотекийн зээл хотын төвийн 6 дүүрэгт хэзээнээс хэрэгжихийг иргэд асуудаг. Тэгвэл 5 хувийн хүүтэй зээлийн дараагийн үе шат яригдаж эхэлжээ. Дараагийн үе шатыг эхлүүлэхдээ ашиглалтын шаардлага хангахгүй болсон хуучин байруудыг дахин барилгажуулах төслийн хүрээнд баригдсан шинэ орон сууцнуудад олгож эхлэхээр төлөвлөж байгаа гэж эх сурвалж мэдээллээ. Ингэвэл энэ жилдээ хотын төвийн 6 дүүргийн хувьд цөөн тооны орон сууцанд  5 хувийн хүүтэй зээл олгогдоно гэсэн үг. Одоогийн байдлаар ашиглалтын шаардлага хангахгүй нь тогтоогдсон 150 гаруй орон сууцны барилга нийслэлд байгаагаас 80 гаруйг нь дахин барилгажуулах захирамж гарсан. Эдгээрээс эхний ээлжинд Хан-Уул дүүргийн нутаг дэвсгэр дэх “Нэхмэлийн шар”-ууд, Баянгол дүүргийн нутаг дэвсгэр дэх Төмөр замын шарууд, Баянзүрх дүүргийн 16 дугаар хорооллын нутаг дэвсгэр дэх хуучин байрууд  дээр тус тус  төсөл хэрэгжүүлэгчид шалгараад байна. Эдгээрээс Хан-Уул дүүргийн Арьс ширний үйлдвэрийн ажилчдын байр гэгдэж байсан 25, 26-р байрыг дахин барилгажуулахаар шалгарсан “Эфэс Констракшн” компани нэг байрыг нь өнгөрсөн жил буулгаж, “Морьтон” цогцолборын ажлаа эхлүүлсэн. Тус компанийн хувьд эхний ээлжийн орон сууцаа энэ жил ашиглалтанд оруулахаар төлөвлөсөн байна. Мөн Хан-Уул дүүрэгт “Нутгийн буян” групп “Нэхмэлийн” нэг байрыг буулгаж орон сууцны ажлаа эхлүүлсэн байгаа юм. Зарим компанийн барилгын ажил ийнхүү явж байгаа ч “Нэхмэлийн” бусад байрууд дээр шалгарсан нэр бүхий компаниуд барилгын ажлаа эхлүүлэхгүй удаж байна гэх гомдол гарч байгаа. Оршин суугчдын зарим нь гэрээ хийхгүй байгаагаас барилгаа буулгаж болохгүй байна гэх тайлбарыг төсөл хэрэгжүүлэгчид хэлдэг. Ажлаа тодорхой хугацаанд эхлүүлэхгүй бол төслийн зүгээс эрхийг цуцлана гэдгээ нийслэлийн удирдлагууд илэрхийлээд байгаа юм.
Төмөр замын шаруудыг дахин барилгажуулахаар 7 компани шалгарснаас Барс захын хойд талын хуучны шар байрууд дээр төсөл хэрэгжүүлэх компаниуд эхний ээлжийн орон сууцаа энэ хавар буулгаж, ажлаа эхлүүлэхээр төлөвлөсөн гэж НЕТГ-аас мэдээлсэн.

Эх сурвалж:www.zms.mn