Б.ЭНХ

Цэцэрлэг хотод Түрээсийн орон сууц өнөөдөр ашиглалтад орж, 120 айл байрныхүү түлхүүрийг гардан авлаа. Ерөнхий сайд Ч.Сайханбилэг тус аймагт өнгөрсөн оны арванхоёрдугаар сард айлчлах үеэр барилгын ажил нь дууссан гурван блок 120 айлын орон сууцанд түрээсийн нөхцөлтэйгээр хамруулж өгөхийг ард иргэд хүсчээ. Архангайчуудын хүсэлт өнөөдөр биеллээ олсон нь энэ юм.

Түлхүүр гардуулах ёслолын үеэр Эрдэнбулган сумын I багийн иргэн өндөр настан Ш.Очирбат “Би өнөөдөр шиг ингэж баярлаж байсангүй. 2012 оноос өмнө орон сууцанд орох нь мөрөөдөл байж, орох орон сууц нь ч ховор байлаа. Түрээсийн орон сууцны хөтөлбөр ийнхүү биелэлээ олж өнөөдөр ядарсан, хоёр хөгшин түрээсийн байрныхаа нээлтэд оролцож, батламжаа гардан авч байгаад хязгааргүй баярлаж байна” гэлээ. Энэ үг зөвхөн нэг ахмад хүний үг бус залуу гэр бүлийн, хөгжлийн бэрхшээлтэй иргэдийн, төрийн албан хаагчдын, байгалийн гамшигт орон гэргүй болсон нийт иргэдийн хэлэхийг хүссэн дуу хоолой гэхэд хилсдэхгүй.

Архангай аймагт 2012 оноос өмнө 650 гаруй айл өрх тохилог орон сууцанд амьдардаг байсан бол өнөөдөр 1363 айл өрх орон сууцанд амьдарч байна гэсэн судалгаа байна.

Эх сурвалж: www.polit.mn