М.ЦЭЦЭГ

УИХ дахь МАН-ын бүлэг, Монголын хүнсчдийн холбоо хамтран  "Төрөөс хүнсний талаар баримталж буй бодлого-тулгамдсан асуудал" сэдэвт нээлттэй хэлэлцүүлгийг өнөөдөр Төрийн ордонд зохион байгууллаа. Хэлэлцүүлэгт УИХ дахь МАН-ын бүлгийн дарга С.Бямбацогт, УИХ-ын гишүүн Ж.Энхбаяр, Я.Содбаатар нар болон АПУ, “Талх чихэр”, “Сүү”, “Мах маркет”, “Хүнс комплекс”, “Дархан хүнс” зэрэг хүнс үйлдвэрлэгч, бизнес, худалдаа эрхлэгчдийн төлөөлөл оролцлоо.

Хүний хамгийн анхдагч хэрэглээ болох хүнсийг үйлдвэрлэж буй компани, үйлдвэр, аж ахуйн нэгжүүд тулгамдаж буй асуудлаа УИХ-ын гишүүдэд танилцуулж, үндэсний аюулгүй байдлын хэмжээнд яригдах стратегийн гол салбараа төрийн бодлогоор хамгаалж, хэрхэн дэмжих талаар УИХ дахь МАН-ын бүлгийн төлөөлөл хамтран ажиллах тухайд санал солилцлоо. Гол нь энэ салбарт хууль эрх зүйн орчин ямар байгаа, тулгамдаж буй гол асуудлууд, төрийн дарамт байна уу,  төр засгийн ямар бодлого үгүйлэгдэж буй, дотоодын үйлдвэрлэлээ хамгаалахын тулд импортын барааны татварыг нэмэх цаг болсон уу, татвар нэмсэнээр импортын бараатай өрсөлдөж чадах уу зэрэг асуудлыг хөндөж ярилцах цаг болсныг УИХ дахь МАН-ын бүлгийн дарга С.Бямбацогт хэлэлцүүлгийг нээхдээ онцлов.

Хүнс үйлдвэрлэгчид татварын дарамтад байгаагаас эргэлтийн хөрөнгө дутмаг, импортын бараатай өрсөлдөх боломжгүй байгаагаа учирлалаа. Тэд НӨАТ-ын дарамтын нөлөөг бүгд шүүмжлэв. Үйлдвэрлэгчдэд ийм дарамттай байдаг тул НӨАТ-ыг “Нэмж өрөнд оруулдаг албан татвар” гэж нэрлэдэг гэнэ.

Хэлэлцүүлэгт оролцсон хүнс үйлдвэрлэгчдэд тулгамдсан асуудлыг УИХ дахь МАН-ын бүлэг анхааралдаа авч сонгуулийн мөрийн хөтөлбөртөө тусган төрийн бодлого болгон хэрэгжүүлэх чиглэлээр ажиллах юм байна.

Эх сурвалж: www.polit.mn