Б.ЭНХ

Замын цагдаагийн газраас зам тээврийн ослын хор уршгийг хүүхэд багачууд, олон нийтэд  таниулах, замын хөдөлгөөнд аюулгүй зөв оролцох мэдлэг олгох, зам тээврийн осолд хүүхэд өртөж байгаа байдалд олон нийтийн анхаарлыг хандуулах, замын хөдөлгөөний аюулгүй байдлын тухай мэдээ мэдээллийг хүргэх, эцэг эх, асран хамгаалагч, замын хөдөлгөөнд оролцогчдын үүрэг, сахилга хариуцлагыг дээшлүүлэх, хүүхдийг зам тээврийн гэмт хэрэг, ослоос урьдчилан сэргийлэх чиглэлээр жил бүрийн дөрөвдүгээр сарын 10-ны өдөр “Хүүхдийг зам тээврийн ослоос урьдчилан сэргийлэх өдөр”-ийг тэмдэглэн өнгөрүүлдэг. Энэ удаа гуравдахь жилдээ зохион байгуулахаар болжээ.  

Сүүлийн зургаан жилийн байдлаар улсын хэмжээнд хүүхэд өртсөн зам тээврийн осол 6063 бүртгэгдэн 6295 хүүхэд осолд өртжээ. Зам тээврийн ослын улмаас 250 хүүхэд амь насаа алдаж,  6045 хүүхэд гэмтэл авснаас 1131 нь хүндэвтэр, хүнд гэмтжээ. 

Нас барсан, гэмтсэн хүүхдийн үзүүлэлт:

2015 онд гэхэд улсын хэмжээнд хүүхэд өртсөн зам тээврийн осол 1112 бүртгэгдэж, 1143 хүүхэд өртсөнөөс 54 хүүхэд нас барж, 1089 хүүхэд гэмтсэн байна. Тэгвэл энэ оны эхний гурван сарын байдлаар улсын хэмжээнд найм /нийслэлд нэг/ хүүхэд нас барж, 37 хүүхэд хүнд, хүндэвтэр гэмтэл авчээ.

ХҮҮХДИЙН АЮУЛГҮЙ БАЙДЛЫГ ХАНГАХАД ТАНЫ АНХААРАХ ЗҮЙЛ:

1.    Явган хүний гэрэл дохио, гарцтай, гарамтай хэсгээр зам хөндлөн гарга. Ойртон ирсэн тээврийн хэрэгслийг өнгөрүүлж гарга.

2.    Тээврийн хэрэгсэл дотор хүүхдээ өвөр дээрээ болон зогсоо байдлаар авч явахгүй,  хүүхдэд хамгаалах бүс, хамгаалах суудал, суудал өндөрсгөгч хэрэглэж, аюулгүй зөв тээвэрлэ.

3.    “Гэр-Сургууль-Гэр” маршрутыг нь зуруулж, дагуулж явж зааж сурга, хэвшүүл.

4.     Хүүхдээ асран хамгаалагч, харгалзах хүнтэй хөдөлгөөнд оролцуул.

5.    Замын зорчих хэсгээр явуулахгүй, тоглуулахгүй байх,

6.    Хөдөлгөөнд оролцох үед нь утсаар яриулахгүй, мессэж бичихгүй, чихэвчний хөгжим сонсгохгүй байлгахад анхаарах.

7.    Алхам тутамдаа аюулгүй байдлаа хангаж хөдөлгөөнд оролцохыг уриалж байна.

Эх сурвалж: www.polit.mn