Ц.БАЯР

2016 оны ээлжит сонгуулийг зохион байгуулахтай холбоотой улсын төсвөөс санхүүжүүлэх зардлын хэмжээг 16 тэрбум 453 сая 912 800 төгрөгөөр тогтоож баталсан байна.  2012 оны Улсын Их Хурлын сонгуультай нийслэлийн ИТХ-ын сонгууль хамт явагдсан. Тэр үед Улсын Их Хурлын сонгуульд 16,8 тэрбум төгрөг зарцуулсан бол нийслэлийн ИТХ-ын сонгуульд 464 сая төгрөг, нийт 17.3 тэрбум төгрөг зарцуулагдсан. Энэ удаагийн сонгуульд аймгийн ИТХ-ын сонгууль нэмэгдэж байгаа гэж үзвэл түрүүчийн Улсын Их Хурал болоод нийслэлийн ИТХ-ын сонгуулиас нэг тэрбум орчим төгрөгөөр бага зардлаар хийх гэж байгаа ажээ. 2012 оны аймаг, сум, дүүргийн ИТХ-ын сонгуулийн нийт зардал 5.2 тэрбум төгрөг байсан байна. Тэгвэл энэ зардал нэг тэрбум орчмоор буурч байгаа ажээ. “ 2012 оныг 2016 онтой харьцуулахад санал авах сонгуулийн насны хүний тоо 146 мянгаар 1905 хэсэг байсан бол одоо 2091 хэсэгтэй болж ажиллах хүний тоо урьдчилсан тооцоогоор 5000 гаруйгаар тус тус нэмэгдэж байгаа тул энэ хэмжээгээр зардал нэмэгдэж байна. Түүнчлэн УИХ-ын  сонгууль аймаг, нийслэлийн ИТХ-ын сонгууль хамт явагдах учир саналын хуудасны зардал нэмэгдэнэ. Гэсэн ч сонгуулийн зардал өмнөх дөрвөн жилийн сонгуулиас 400 гаруй сая төгрөгөөр багаслаа.” гэж Сонгуулийн ерөнхий хорооны дарга Ч.Содномцэрэн тайлбарлажээ.

Эх сурвалж: www.zms.mn