Ц.БАЯР

Дөрөвдүгээр сарын оффисийн зах зээлийн судалгаагаар 2016 онд нийт 62 мянга 284 метр квадрат талбай бүхий шинэ оффис ашиглалтад ороод байна. Энэ шинэ талбайн 56.4 хувь нь худалдаалагдаж байгаа бол үлдсэн 43.6 хувь нь түрээсийн үйл ажиллагаа явуулж байгаа ажээ. Оффисийн нэг метр квадрат талбайн дундаж үнэ 4.6 сая төгрөгийн ханштай байгааг судалгаанд тусгасан байна. Худалдааны ханшийг өмнөх оны мөн үеийн үзүүлэлттэй харьцуулахад 8 хувиар бага байгаа бол түрээсийн үнэ нэлээд хэмжээгээр буурсан байна. Оффисийн түрээсийн дундаж үнэ нэг метр квадрат нь 28 мянган төгрөг байгаа нь өнгөрсөн оны мөн үеэс 12.5 хувиар буурсан үзүүлэлт болж байна. Оффисийн талбайн нийлүүлэлт идэвхжиж, үнэ буурах хандлагатай байгаа ч хотын А бүсэд өндөр төвлөрөлтэй хэвээр байгаа ажээ. Тухайлбал “Galaxy Tower”, “Seoul Plaza”, “Twin tower” зэрэг 2015-2016 онд шинээр баригдсан оффисуудын 89 хувь нь Сүхбаатар дүүрэгт, 11 хувь нь Хан-Уул дүүрэгт байрлаж байна гэж  “Mongolian Properties Management Group”-ээс  мэдээлжээ.

Эх сурвалж:www.zms.mn