Ц.БАЯР

“Да хүрээ” захад автомашины худалдаа үйлчилгээ эрхлэгчдийг тавдугаар сарын 1-нээс  22-ын товчооны орчимд баригдсан “ Автомашины цогцолбор”- т шилжүүлж албадан  нүүлгэх Нийслэлийн Засаг даргын  шийдвэр гарсан. Энэхүү шийдвэрийг эсэргүүцэж тус захад үйл ажиллагаа эрхэлдэг И.Бат-Од, Б.Алдар нарын хэсэг худалдаачид өнөөдөр / 2016 04.06 /олон нийтэд хандлаа. Тэд Баянзүрх  дүүргийн 9,17,19 дүгээр хорооны 30 гаруй мянган иргэд тэнд худалдаа үлйчилгээ эрхэлж, аж амьдарлаа төвхнүүлсэн. Тус захыг  нүүлгэснээр олон мянган иргэд амьжиргаанаасаа салж, үл хөдлөх хөрөнгө  үнэгүйдэж, хүүхэд багачууд сургууль цэцэрлэгээс холдох зэргээр хохирч үлдэхээр байгаа тул эл шийдвэрийг эрс эсэргүүцэж  байна. Тиймээс хотын дарга амьдралд нийцэхгүй шийдвэрээ эргэн харж автомашины худалдаа үйлчилгээ  эрхлэгчид түрээслэгчдийн хэвийн амьдралыг хангахыг тэд шаардаж байна гэлээ. “Автомашины цогцолбор”-т бизнес эрхлэх орчин бүрдээгүй. Цогцолбор ажиллаж эхлээгүй байхад газрын наймааг өөгшүүлж үнийн хөөрөгдлийг бий болгож буйг тэд  буруушаасан юм. Ажилтай нэг хүн ардаа 7-10 ам бүл тэжээдэг. Тэдний хоол унд, амьжиргааны мөнгө, хичээл сургалтын зардлыг Да хүрээ захад ажиллаж цуглуулдагаа тэд учирлаж байв. Худалдааны төвөө өргөжүүлэхээр банкнаас 4 тэрбум төгрөгийн зээл авч барилга барьсан хүмүүс банкны өрөө төлөх гэж зүдэрч байгаа жишээг ч дурьдлаа. Бизнес эрхлэгчид одоогийн худалдаа эрхэлж буй байршлаа хамгаалж үлдэхээр шүүхэд хандсан аж. Мөн “ Даяар хас”, “ Нийтийн эрхийг хамгаалах холбоо”, Да хүрээ худалдааны төвийн болон Нийслэлийн автомашин болон сэлбэгийн худалдаа эрхлэгч иргэдийн үйлдвэрчний хороо зэрэг байгууллагууд нэгдэн эрх ашгаа хамгаалахаар “ иргэдийн амьдарлаар бүү тогло” хэмээн хотын мэрд сануулсан гэнэ. Төр иргэнийхээ үгийг сонсохгүй энэ нийгмийг өөрчлөхийн төлөө нэгдэж тэмцлийн хурц хэлбэрийг сонгоно гэлээ.

Эх сурвалж:www.zms.mn