С.УЯНГА

“Улсын сайн малчин” цолны үнэмлэх тэмдгийг урьд жилүүдэд зөвхөн гэрийн эзэнд гардуулдаг байсан бол энэ жилээс эхнэр, нөхөр хоёуланд нь өгдөг болсон. Тэгвэл ХХААЯ-наас “Улсын сайн малчин” цол тэмдгээ аваагүй хүмүүст нөхөн олгохоор болсныг өнгөрсөн долоо хоногт Хөдөлмөрийн яамнаас зохион байгуулсан “Малчны залуу халаа” хэлэлцүүлгийн үеэр ХХААЯ-ны Мал аж ахуйн бодлого зохицуулалтын газрын дарга С.Жавхлан хэлсэн юм. Түүнээс зарим зүйлийг  тодрууллаа.

-“Улсын сайн малчин” цол тэмдгийг хэдэн хүнд нөхөн олгох вэ?

-Малчдаас энэ жилийн шийдвэртэй холбогдуулан “Улсын сайн малчин”-ы цол тэмдгийг эхнэртээ нөхөж авмаар байна гэсэн хүсэлт маш их ирж байна. Энэ хүсэлтийн дагуу манай яамнаас тооцоо судалгаа хийж байна. Энэ онд 21 аймаг, нийслэлээс нийт 118 малчныг “Улсын сайн малчин”-аар тодруулсан. Ер нь “Сайн малчин”-ы цол тэмдгийг жилд хэдэн мянгаараа биш 70-80 хүнд олгодог учраас харьцангуй боломжтой гэж үзэж байгаа. Хэдэн жилийн өмнөхийг ч олгох боломжтой.

-Эхнэртээ цол тэмдгийг нь нөхөж авч өгөхийг хүссэн хүмүүс хаана хандах вэ. Энэ ажилд хэдэн  төгрөг зарцуулж байгаа вэ?

-Одоогоор тооцоо судалгаа хийж байгаа учраас нэгдсэн тоо гараагүй байна. Хэдийгээр яаман дээр яригдаж, судалж байгаа асуудал ч гэсэн төсөв мөнгөний асуудал шийдэгдээгүй байгаа. Засгийн газрын хуралдаанд оруулсны дараа малчдад тодорхой мэдээлэл өгнө.

-Энэ ажил яг бодит болох уу?

-Малчдаас ирж байгаа хүсэлт, мөн салбарын яамны хэмжээнд яригдаад тооцоо судалгаа хийж байгаа учраас цол тэмдгийг нөхөн олгох ажил бодит болно.

Эх сурвалж: “Зууны мэдээ” сонин