Д.АРИУН

 “Алтан аргамж” цуврал номын долоо дахь нь гарлаа. Цувралын энэ дугаарт Элчин сайд Д.Ёндон, Ц.Гомбосүрэн, Ж.Чойнхор, Г.Луузан, Б.Нямаа, Ю.Сандаг, Р.Янжмаа зэрэг Монгол Улсын орчин цагийн дипломат албанд хүчин зүтгэсэн, олны танил мэргэжлийн дипломатчдын сонирхолтой түүх өгүүлсэн дурдатгал, дурсамж оржээ.

Монгол Улсын Гадаад явдлын Яамны нэгдүгээр орлогч сайдаар тасралтгүй 19 жил ажилласан Элчин сайд Д.Ёндон “Сайд нарын томилолт” хэмээх дурдатгалдаа Цэдэнбал Филатова хэрхэн Гадаад явдлын яамны сайд  М.Дүгэрсүрэнг албан тушаалаас нь авч хаяхад хүрч байсан тухай, уг асуудалд Москва оролцож М.Дүгэрсүрэнг ажил албанд нь үлдээж байсан тухай урьд хожид сонсогдоогүй сонин баримт дэлгэжээ.

1990-ээд оны эхээр Зөвлөлтийн цэргийг Монголоос бараг л “хөөж тууж” гаргасан юм шиг дам яриа байдаг.  Тэгвэл яг тэр он жилүүдэд Гадаад явдлын яамны сайдаар ажиллаж байсан Ц.Гомбосүрэн тухай үеийн нөхцөл байдлыг баараггүй мэдэх хүний хувьд цэрэг гаргах үйл ажиллагаа хоёр Засгийн газрын хэлэлцэж тохирсон ёсоор, Засгийн газрын хяналтын доор  явагдаж дууссан тухай бодит баримт түшиж бичсэн нь үнэмшилтэй бас судалгааны ач холбогдолтой болжээ.

Элчин сайд Б.Нямаа, Ч.Агваандамдин нарын ахмад дипломатчид дайн дажинтай улсад алба хашсан он жилүүдийнхээ сэтгэлд хоногшсон, амь нас эрсдэх аюул занал нүүрлэсэн цаг мөчид ажил үүргээ хэрхэн гүйцэтгэж байсан тухай өгүүлсэн дурсамж дурдатгалууд  ч цувралд оржээ.

“Алтан аргамж” цуврал номыг  “Монгол элч”  ТББ—аас эрхлэн гаргадаг байна.  Цуврал бүтээлүүдийн талаар дэлгэрэнгүй мэдээллийг авахыг хүсвэл 95705295  дугаарт холбогдох боломжтой аж.

Эх сурвалж: www.polit.mn