“ЗМ”-ний тодруулга

Б.ЭНХ

Ховд аймагт шүлхий гарч Улсын онцгой комиссын шийдвэрээр тус нутагт хорио цээрийн дэглэм тогтоогоод байна. Цаг үеийн байдал ямар байгааг аймгийн Онцгой байдлын хэлтсийн дарга, дэд хурандаа С.Өлзийхишигээс тодрууллаа.

-Танай нутагт шүлхий хурдтай тархаж байна гэж дууллаа. Одоогоор хэчнээн мал өвчлөөд байна?

-Халдварын голомтод шинээр 41 мал өвчилсөн нь бүртгэгдсэн. Нийт 840 толгойд хүрээд байна. Одоогийн байдлаар гурван суманд нийт 315940 толгой мал вакцинжуулахаас 27.1 хувийг вакцинжуулсан мэдээтэй.

-Ямар сумуудад хөл хорио тогтоосон бэ ?

-Улсын онцгой комиссын шуурхай ажлын хэсгийнхэн өнгөрсөн бямба гаригт газар дээр нь ажиллаж Булган, Үенч, Алтай суманд хорио цээрийн дэглэмийг чангатгах үүрэг өгсөн. Тухайлбал, Булган, Үенч сумаас гарах мал амьтан, хүн, тээврийн хэрэгслэлийн хөдөлгөөнийг бүр мөсөн зогсоогоод байна. Тиймээс эдгээр сум руу зорчихгүй байхыг анхааруулъя.

-Хилийн боомтоор нэвтрэх иргэдийн тоог хязгаарласан гэв үү?

-Булган суман дахь хилийн боомтоор зорчих иргэдийн тоог хязгаарлаад байна. Улсын онцгой комисс болон аймаг, сумын Засаг дарга нарын гаргасан захирамжийг хэрэгжүүлж мал эмнэлэг, онцгой байдал, цагдаагийн 100 гаруй албан хаагч ажиллаж байна.

Эх сурвалж: "Зууны мэдээ" сонин