Нийслэл, дүүргийн прокурорын газруудаас Нийслэлийн Чингэлтэй, Баянзүрх,  Сүхбаатар, Баянгол, Хан-Уул, Сонгинохайрхан дүүргийн Цагдаагийн хэлтсүүдийн  Албадан саатуулах байр, Улаанбаатар хотын Цагдаагийн газрын харьяа “Албадан саатуулах төв”-ийн үйл ажиллагааг шалгасан байна.
Харин шалгалтаар дүүргүүдийн Цагдаагийн хэлтсийн дэргэдэх  албадан саатуулах байрууд нь хууль журамд заасан шаардлагуудыг хангаагүйн улмаас хүний эрхийг ноцтой зөрчиж байгаа нь илэрсэн байна. Тодруулбал, ахуйн нөхцлийн хувьд байгалийн гэрэлтүүлэггүй, агааржуулалтын системгүй, цагдаагийн хэлтсийн подвальд байрласан зэрэг эрүүл ахуйн наад захын шаардлага хангаагүй, саатуулагдсан этгээдийг хооллох, усанд оруулах болон эмчийн үзлэг хяналтанд хамруулах боломжгүй, саатуулагдсан хүмүүсийг нэг өрөөнд олноор  байрлуулсан зэрэг олон ноцтой зөрчил илэрсэн байна.
Тиймээс хууль, журамд заасан шаардлага, нөхцлийг бүрэн хангаж иргэдийг албадан саатуулах үйл ажиллагаа явуулах,  албадан саатуулах байрнуудын ахуй нөхцөл, үйл ажиллагааг хууль журамд нийцүүлэх, зөрчлүүдийг засаж ажиллуулахаар  Улаанбаатар хотын Цагдаагийн газарт прокурорын шаардлага  хүргүүлжээ.

Эх сурвалж: www.polit.mn