Ц.БАЯР

Төрийн Өмчийн Хорооны дарга асан явсан Д. Сугарын хүү хар тамхины хэрэгтээ хоёрхон жилийн ял авчээ. Өнгөрч буй долоо хоногт  Үндсэн хуулийн цэцийн гишүүн Д.Сугарын хүү С.Цог нарын 11 хүнийг хар тамхины  хэргээр дүүргийн эрүүгийн хэргийн анхан шатны нэгдүгээр шүүхэд шүүлээ.  Шүүх бүрэлдэхүүн С.Цог, Э.Золбадрал, Б.Энхтайван нарт хоёр жилийн хорих ял, Г.Ууганбаярт зургаан сарын хугацаатай баривчлах ял оноосон юм. Харин  Т.Тамир, О.Анударь, Н.Оюунжаргал нарын хэргийг хэрэгсэхгүй болгожээ.  Бусад холбогдогчдийн хэргийг тэнсэн харгалзахаар болсон юм. Төрийн өмчийн хорооны дарга асан, Үндсэн хуулийн цэцийн гишүүн Д.Сугарын хүү ял сонссон нь олны гайхшралыг төрүүлж буй. Учир нь Д.Сугар бол МИАТ-ын хэрэгт ч нэр холбогдож, их хэмжээний мөнгө цаас идэж уусан тухай баримт дэлгэгддэг. Бусад нь ял сонсч, хариуцлагаа үүрсэн байтал Д.Сугар хэргээс мултарч, сул чөлөөтэй тэр бүү хэл ажил албан тушаал нь ахисаар өдий хүрч байгаа юм. Тэрбээр хар тамхины хэрэгт холбогдсон хүүгээ ч мөн сугалж авахын тулд бишгүй хөөцөлдсөн гэх мэдээлэл байдаг. Гэвч эцэстээ хуулийн байгууллага Д.Сугарын хүүг яллаж, хариуцлага хүлээлгэж чадлаа. Өөрөө бол хэргээс мултарч, эрх чөлөөтэй явж чадсан, харин бусдын хүүхдэд ял үүрүүлээд өөрийн хүүгээ сугалж үлдэх гэсэн Д.Сугарын мөрөөдөл талаар болж , тэр хүчин мөхөсдлөө. Гэхдээ хоёр жилийн ялыг хоёрхон сар ч эдлэж магадгүй. Мөнгөтэй хүмүүст хууль үйлчлэх биш.

Эх сурвалж: www.polit.mn