Н.ДАЯН

Нийгмийн захиалгыг хэрэгжүүлэхэд өөрийн хувь нэмрийг оруулахаар хэсэг эрдэмтэн судлаач, нийгмийн зүтгэлтнүүд санаачлан “Эвийн хэрэм” үндэсний хөдөлгөөнийг байгуулж албан ёсоор үйл ажиллагаагаа эхлүүлж байна. Үндэсний хөдөлгөөн нь иргэдийн санаачлага, сайн дурын үндсэнд үүсгэн байгуулсан, гишүүнчлэлтэй, үндэсний хэмжээнд үйл ажиллагаагаа явуулах үндэсний хөдөлгөөн, иргэний нийгмийн байгууллага аж.

Эе эвийн үзэл санааг “Биеэ зас, биеэ засаад гэрээ зас, гэрээ засаад төрөө зас” хэмээн томъёолжээ. Монгол ухаанаар хүчирхийлэл, түрэмгийллээс ангид эв зүйгээр эв нэгдэлд хүрэх замаар монголын нийгмийн хөрсөн дээр, бодит амьдрал дээр хэрэгжүүлэхээр зорьж байгаа аж. Тус хөдөлгөөн нь үйл ажиллагааныхаа үндсэн аргыг “Эвийн чуулган” хэмээн үзэж байна. “Эвийн хэрэм” үндэсний хөдөлгөөн нь Монголын ард түмний хөдөлгөөн бөгөөд эв эеийг эрхэмлэгч хүн бүрт хаалга нь үргэлж нээлттэй байх ажээ.

Монгол Улсаа хөгжүүлье, төрөө нэртэй, хүчирхэг, шударга, улсаа бүтэн байлгая. Газар нутаг, байгаль орчиндоо хайр гамтай хандаж, хүн бүр сайн сайхан амьдрая гэвэл монголчууд бид эе эвийг сахиж, талцал хуваагдлыг арилгах, төр ард түмний хоорондын итгэлцлийг сэргээх, эе эвийн эрхэм ёс, эв нэгдлийг дээдлэх зайлшгүй түүхэн шаардлага тулгарч байна хэмээн санаачлагчид ярьж байлаа.