Ц.БАЯР

Орон сууцыг ашиглалтанд орсны дараа арга хэмжээ авах биш, өмнө нь анхаарал хандуулах үүднээс барилга байгууламжийг ашиглалтанд хүлээж авах улсын комисст ШӨХТГ-ын төлөөлөл оролцохоор болж, БХБ-ын сайд Д.Цогтбаатар, ШӨХТГ-ын дарга Т.Аюурсайхан нар өнөөдөр санамж бичиг солилцлоо.Санамж бичигт барилгын тусгай зөвшөөрөл олгох комисст ШӨХТГ-ын төлөөлөл оролцохоор болсныг тусгасан байна. Ингэснээр орон сууцны талбайн хэмжээ, зураг төсөл, архитектур төлөвлөлтийн даалгаварт тусгагдсан гадна тохижилт, ногоон байгууламжаас гадна барилгын чанар стандарт нь хэрэглэгчийн шаардлагад нийцэж байгаа эсэхэд анхаарах аж. Өмнө нь ашиглалтанд орсон орон сууцны талбай гэрчилгээнд заасан хэмжээнээс дутуу байсан талаар 900 орчим иргэнээс 70 орчим компанитай холбоотой гомдол гаргасны дагуу ШӨХТГ-аас шалгалт хийхэд нийт хохирлын хэмжээ 3,7 тэрбум төгрөгөөр хэмжигдэж байсны 1,5 тэрбум төгрөг нь “МДТОФ”, “Тайгам Алтай”, “Тектоник” зэрэг гурван компанийн иргэдэд учруулсан хохирол байсан юм. Дээрхи компаниуд улсын байцаагчийн шаардлагыг хүлээж авахгүйгээр шүүхэд хандсан бол алдаа дутагдлаа хүлээн зөвшөөрсөн компаниуд одоогийн байдлаар иргэдийн 1,5 орчим тэрбум төгрөгийн хохирлыг барагдуулсан байна.

 Эх сурвалж: www.polit.mn