Э.ОРХОН

Монгол хэл бичгийн шалгалтын бүртгэл энэ долоо хоногт дуусна. Энэ талаар Боловсролын үнэлгээний төвийн хэвлэл мэдээлэл, олон нийттэй харилцах мэргэжилтэн Ө.Төгөлдөрөөс тодрууллаа.

-Монгол хэл бичгийн шалгалтын бүртгэл энэ долоо хоногт дуусч байгаа. Бүртгэлийн явц ямар байна вэ?  

-Монгол хэл бичгийн шалгалтын бүртгэл гуравдугаар сарын 9-ний 18:00 цагт дуусна. Бүртгэлийн хугацааг сунгах боломжгүй учраас үлдсэн хугацаандаа амжиж бүртгүүлэхийг элсэгчиддээ сануулж байна. Энэ жил ерөнхий боловсролын сургуулиа төгсч байгаа шалгуулагчдын бүртгэл автоматаар хийгдэж, суудлын хуваарь нь суралцаж буй сургуулиар нь тараагдана. Өнөөдрийн байдлаар 1100 орчим өмнөх оны төгсөгч бүртгүүлсэн байна. Үүн дээр энэ оны 19293 төгсөгч нэмэгдэнэ.

-Монгол хэл бичгийн шалгалтын бүртгэлд бүртгүүлж байгаа элсэгчид юуг анхаарах ёс вэ?

-Бүртгүүлэхдээ ямар нэг алдаа гаргахгүй байх хэрэгтэй. Хувийн мэдээлэлд ямар нэг алдаа гаргасан тохиолдолд бүртгэл дуусахаас өмнө Боловсролын үнэлгээний төвд ирж засуулах боломжтой. Мөн өмнөх оны шалгуулагчид манай төвд гуравдугаар сарын 20-ноос өмнө ирж, монгол хэл бичгийн шалгалтын бүртгэлийн хуудсаа баталгаажуулна.

-Бүртгүүлж амжаагүй төгсөгчид хаана хандаж бүртгүүлэх вэ?

-Шалгалтад бүртгүүлэхдээ www.eec.mn цахим хаягаар орж бүртгүүлнэ. Дэлгэрэнгүй мэдээллийг Боловсролын үнэлгээний төвийн 70119498 утсаар лавлах боломжтой.

Эх сурвалж: www.polit.mn