Б.ЗАЯА

Ноён уулаа аврах, Урт нэртэй хуулийн өөрчлөлтийг эсэргүүцсэн иргэний хөдөлгөөнүүдийн тэмцэл үргэлжилсээр байна. “Босоо хөх Монгол” бүлгэмээс Чингисийн талбайд тайван цуглаан зохион байгуулав. Энэ үеэр бүлгэмийн гишүүд Урт нэртэй хууль, Ноён уулын асуудлаар өнгөрсөн долоо хоногт болсон Ерөнхийлөгчийн дэргэдэх Иргэний танхимд болсон хэлэлцүүлгийн талаар олон нийтэд мэдээлэл өгсөн юм. Тэдний шийдвэр гаргагчдад тавьсан асуулт хариултаа авч чадаагүй төдийгүй хэлэлцүүлгээс үр дүн гараагүйг онцлов. Энэ тухай “Босоо хөх Монгол” бүлгэмийн тэргүүн П.Шинжээравдан “Бид газар нутгаа бүрэн бүтэн авч үлдэхийн тулд 13 хоногийн турш өлсгөлөн зарлаж, 22 мянган хүний гарын үсэгтэй шаардах бичгийг Ерөнхийлөгчид хүргүүлсэн. Гэвч Ерөнхийлөгчийн Тамгын газрын дарга П.Цагаан бидний тэмцлийг доромжилж 22 мянга ч бай, хоёр хүний ч бай шаардлагаар хуульд хориг тавьдаггүй. Энэ бол эртний Грек, Ромын үеийн хоцрогдсон шийдэл гэсэн. Ардчилсан нийгэмд ард түмний хүсэл, эрмэлзэл юу ч биш юм байна. Гэхдээ бид хэзээ ч бууж өгөхгүй” гэж байв. Цуглаанд гавьяат жүжигчин Бүрнээбаяр, Хар сарнай хамтлаг зэрэг урлагийн төлөөллийнхөн ирж ая дуугаа өргөв.

Эх сурвалж: polit.mn