Ц.БАЯР

Монголчууд эрт дээр үеэс Цагаан Дарь эхийг шүтэж ирсэн. Шинийн наймны билэгт энэ сайн өдөр  Богд хааны музейд “Цагаан дарь эх” сэдэвчилсэн үзэсгэлэн болон “Нэг өдрийн цагаан дарь эх” бурхан бүтээх үйл ажиллагааг зохион байгууллаа. Дарь эхийг шүтэх явдал маш түгээмэл билээ. Үүнийг өнөө үеийг хүртэл бидэнд уламжлагдан ирсэн Дарь эхийн танка зураг, зээгт наамал, цутгамалуудаас харж болох ажээ. Тэдний дундаас Өндөр гэгээн Занабазарын урласан Дарь эхүүд монголд төдийгүй дэлхий дахинд алдартай. Их хүрээнд шинийн наймны өдөр Цагаан дарь эхийг бүтээдэг байсан уламжлал бий.  Уг уламжлалын тухай Д. Дамдинсүрэн Их хүрээний нэртэй урчууд номондоо “Өндөр гэгээн Занабазарын зурсан 45*35 см хавтгай дөрвөлжин буюу үзүүр тохой хэмжээтэй Цагаан дарь эхийн загвар зургаар Их хүрээнд 1924 оныг дуустал сар бүрийн шинийн найманд “Цагаан дарь эхийг” өдөрт нь багтаан зурж бүтээдэг албан ёсны уламжлалтай байсан бөгөөд тэрхүү бүтээлүүдээс манай музейнүүдэд байдаг юм” гэж тэмдэглэн үлдээжээ. Энэхүү уламжлалыг сэргээн Богд хааны ордон музейд “Цагаан дарь эх” сэдэвчилсэн үзэсгэлэн болон “Нэг өдрийн цагаан дарь эх” бурхан бүтээх үйл ажиллагааг ийнхүү эхлүүлжээ. Үзэсгэлэн гуравдугаар сарын 6-ныг хүртэл үргэлжилнэ гэж урлаг судлаач Г.Саранболор хэлсэн.

Эх сурвалж:www.polit.mn