С.САРУУЛ

Энэтхэг улсад насанд хүрсэн хоёр охиныг найз залуу нь бусад залуустай нийлж бүлэглэн хүчирхийлж амийг нь хороосны дараа Энэтхэг улсын залуус муж мужаас тэмцэлд нэгдэж зөвхөн тэр хоёр охин төдийгүй эмэгтэйчүүдийг хамгаалах тогтолцооны төлөө дуу хоолойгоо  нэгтгэн, үүний үр дүнд Энэтхэг улс эмэгтэйчүүдийн бие даасан шүүхтэй болж байсан. Тэгвэл манай улсад хүүхдээ хазсан,заазуурдсан, хүчирхийлсэн хэрэг гарсаар байгаа ч төр засаг, хариуцдаг байгууллага нь тоосон юм алга. Хүүхдээ хазсан эцэг 3.6 жил, хүүхдээ заазуурдсан эцэг таван жилийн ял сонссон байдаг. Үнэндээ мэдэгдэж байгаа нь л энэ болохоос далд хэлбэрээр үйлдэгдэж байгаа хэчнээн хэрэг байдгийг мэдэхгүй. Дөрвөн настай нялх охин эцэг, хойд эхийнхээ гарт аймшигтайгаар амиа алдсан хэргийн талаар өнөөдөр цахим ертөнцөөр шуугиж, нийтээрээ жигшин зэвүүцэж байна. Талийгаач охин БЗД-ийн эмнэлэгт сэхээнд тав хоноод шархаа даалгүй нас барсан, охины эцэг Баянзүрх дүүргийн цагдаагийн хэлтэст шинжээчээр ажилладаг нэгэн байсан гэдгийг ч Хүүхдийн төлөө газрын дарга И.Нарантуяа хэлж байна. Үнэндээ талийгаач охины ээжийнх нь найз бүсгүй цахим ертөнцөд энэ хэргийг бичсэнээр олон нийт мэдсэн болохоос Хүүхдийн төлөө газар, цагдаагийн байгууллагынхан нэг ч үг дуугараагүй. Дэлгэгдээгүй байсан бол нуугаад өнгөрөх байсныг ч үгүйсгэхгүй. Хүүхдийн төлөө ажилладаг ганц байгууллага болох Хүүхдийн төлөө газар өнгөрсөн хугацаанд хэр дорвитой ажил хийсэн бол. Үнэндээ тус газрын дарга И.Нарантуяа төрсөн эцгийнхээ гарт амиа алдсан бяцхан охины талаар ганц ч үг дуугарахгүй байсаар хэвлэлийнхний шахалтаар өнөөдөр л дуугарч байна. Тэгэхээр Хүүхдийн төлөө газар  гэгч том газар чиг үүргийнхээ дагуу хүүхдийн төлөө ажиллаж байна уу, дорвитой тайлан байна уу гэдгийг олон нийт сонирхоод эхэллээ.   

Төрсөн үрээ хөнөөж байгаа хүн  шоронгоос гарч ирээд өөр хэний хүүхдийг яахыг  мэдэхгүй. Ийм хүйтэн цустай хүмүүсийг шоронд хэдэн жил хориод гаргаад байх уу. Хүүхдээ хазсан, заазуурдсан хүмүүс ганц, хоёрхон жилийн дараа эрх чөлөөтэй болно. Тэд дахиад хэрэг хийхгүй гэх баталгаагүй.

Дээрх хэргүүд  эмэгтэйчүүд, хүүхдээ хамгаалах талаар төрөөс бодлого гаргаж ажиллах цаг ирснийг харуулж байна.  Бид газар нутаг, эх орон, мөнгөний  төлөө жагсаж, суулт өлсгөлөн зарлаж бөөлдөг мөртлөө хүний төлөө, хүүхдийн төлөө нэгдэж дуу хоолойгоо илэрхийлж байсан билүү. Эмэгтэйчүүд, хүүхдэд ээлтэй олон сайхан ажил хийж өөрчилнө, эрхийг нь хамгаална гэж амлаад байсан эмэгтэй гишүүд юу хийж байна вэ.

Эх сурвалж: www.polit.mn