Т.ДАЛАЙ

НИТХ-ын тогтоолоор  автотээврийн хэрэгслийн бүртгэл, төлбөрийн тогтолцоог шинэчилж, автотээврийн хэрэгслийн албан татвар төлөх, хураах ажлыг шинэ системээр явуулахаар болжээ. Энэ талаар НЗДТГ, Улаанбаатар хотын Замын цагдаагийн хэлтэс  өнөөдөр мэдээлэл хийлээ. Албан татварыг шинэчилсэн журмаар хураахдаа, Автотээврийн хэрэгслийн албан татвар, төлбөр хураах ажлыг улсын дугаарын сүүлийн тооноос хамаарч төлөхөөр зохицуулалт хийсэн байна.
Тодруулбал, жолооч таны автомашины улсын дугаар  1,6 тоогоор төгссөн бол нэгдүгээр сард, 2, 7 тоогоор төгссөн бол хоёрдугаар сард, 3, 8 тоогоор төгссөн бол гуравдугаар сард, 4, 9 тоогоор төгссөн бол дөрөвдүгээр сард, 5, 0 тоогоор төгссөн бол тав дугаар сард албан татвараа төлөх ёстой. Уг журмаар, нэг, хоёрдугаар сард оношилгоонд орох байсан 1, 2, 6, 7-ын цифрээр төгссөн дугаартай машинууд энэ сарын үлдсэн хоногууд болон гуравдугаар сардаа багтаж оношилгоондоо хамрагдах ажээ. Харин орон нутагт явдаг хэрнээ Улаанбаатар хотын дугаартай автомашин бол нийслэлд татвараа төлөх учиртай гэнэ.
Харин төлөлтийг аль ч банкаар ямар ч хэлбэрээр төлж болох буюу автотээврийн хэрэгслийн албан татварыг онлайн, интернэт, мобайл банкаар шууд төлөх боломжийг энэхүү журмаар олгожээ.  

Эх сурвалж:www.polit.mn