Б.ТУУЛ

 Монгол Улсын гурван сая дахь иргэн Х.Монголжин болон түүний үе чацуутнууд, тэднийг эх барьж авсан эмч, эх баригч нарт  хүндэтгэл үзүүлэх ёслолын ажиллагаа өчигдөр болов. Модон морь жилийн үхэр сарын шинийн 4-ний өдөр буюу аргын тооллын  2015 оны 01 дүгээр сарын 24-ний өдрийн 08 цаг 27 минутад төрсөн Өмнөговь аймгийн Даланзадгад сумын иргэн Э.Хатанболд, Г.Аззаяа нарын охин Монгол Улсын гурван сая дахь иргэн болж,  Ерөнхийлөгч Ц.Элбэгдорж Х.Монголжин нэр хайрласан билээ. Мөн тэр өдөр төрсөн 180 хүүхэд Монголжин охины чацуутан болсон юм.  Энэ өдөр нийслэлд 84, хөдөө орон нутагт 94, хилийн чанадад гурав гээд нийт 181 хүүхэд төрсний 99 нь хүү, 82 нь охин байсан юм.  Мөн хоёр ихэр хүүхэд тав мэндэлсэн нь Монгол Улс улам олуулаа болохын бэлэгдэл болсон. Тиймээс Монгол Улсыг гурван сая болгосон иргэн, түүний чацуутнууд, тэднийг эх барьж авсан эмч, эмнэлгийн мэргэжилтнүүдэд  Эрүүл мэнд, спортын яамнаас баяр хүргэж, хүндэтгэл үзүүлсэн юм. Уг арга хэмжээнд  Эрүүл мэнд, спортын сайд Г.Шийлэгдамба, Төрийн нарийн бичгийн дарга, газар, хэлтсийн дарга нар, мөн нийслэлийн Эрүүл мэндийн газрын дарга, ЭХЭМҮТ-ийн захирал, нийслэлийн амаржих газрын дарга, гурван сая дахь иргэний ойрын чацуутнуудыг эх барьж авсан хүйн ээж нар, 21 аймгийн Эрүүл мэндийн газрын удирдлага, эмч мэргэжилтнүүд  оролцсон юм.