С.САРУУЛ

Алтны магнат гэгдэж байсан “Монгол газар” компани дампуурлаа зарлах шүүх хурал саяхан болсон билээ. Тэгвэл тус компаниас нэхэмжлэгчээр 14 хувь иргэн, аж ахуйн нэгж оролцсон байна. Мөн “Монгол газар” компанид нийт 84.6 тэрбум төгрөгийн нэхэмжлэл иржээ. Үүнээс 70.7 хувь нь буюу 59.8 тэрбум төгрөгийн өр нь Япон улсын Иточу корпорациас нэхэмжлэлтэй. Мөн “Монгол банк”-нд алтны арилжаатай холбоотой 14.6 тэрбум төгрөг, Архангай аймгийн Засаг даргын Тамгын газарт нөхөн сэргээлт хийгээгүйн хохирол 4.6 тэрбум, Татварын ерөнхий газар 2.6 тэрбум, Чингис хаан банкинд 1.4 тэрбум төгрөг, Баянгол дүүргийн нийгмийн даатгалын хэлтэст 435 сая Нийслэлийн татварын газарт 334 сая төгрөг, иргэн М-д 194 сая төгрөг, Киа моторс компанид 68 сая төгрөг, Хьюндай моторс компанид 18 сая төгрөг, иргэн Д-д таван сая төгрөг, Иргэн Т-д нэг сая төгрөгийн тус тус өртэй байжээ.

Шүүхээс 2015 оны хоёрдугаар сарын 16-ны дотор “Монгол газар” компанид нэхэмжлэлээ гаргах хугацаа өгсөн. Энэ хугацаанд 11 компани нэхэмжлэл гаргасан. Харин хурлын үеэр дахин гурван нэхэмжлэгч нэмэгджээ. Гэтэл нэхэмжлэгчдийн зөвлөл нэмэгдсэн гурван нэхэмжлэгчийг хүлээж аваагүй байна.

Эх сурвалж: www.polit.mn