Ц.БАЯР

Монголчууд байгаль эхийн амин сүнс болсон усны эхэнд хир буртагаа ч оруулахыг цээрлэж  ирсэн ёс заншилтай ард түмэн билээ. Усны эх болсон эмзэг газарт их ордыг  хүчээр олборлох нь эдийн засгийн болоод, байгаль орчинд нөлөөлөх хор хөнөөл тоймолж баршгүй их гарз болохыг иргэнийн хөдөлгөөнийхөн сануулсаар байна. Урт нэртэй хуулийн нэмэлт өөрчлөлтөөр усны эх, усан сан бүхий газрын онцгой хамгаалалтын бүсийг 50-200 метр дотор дотогш бол энгийн хамгаалалтын бүс гэж тогтоож байгаа нь хамгаалалтыг бүрэн үгүйсгэж байгаа ажээ.Тэд энэ бүсийг уурхайд тогтоох гэж байгаа нь шинжлэх ухааны үндэслэлгүй юм хэмээн   Үндэсний мэдээллийн төвд болсон хэвлэлийн хурлын үеэр тэд мэдэгдлээ. Монголын байгаль орчин иргэний зөвлөлөөс урт нэртэй хуулийн хүрээнд байгаль орчинд халтай хуулийн заалтыг сар шинийн баярын үеэр батлагдах магадлалтай хэмээн үзэж энэхүү хурлыг хийлээ. УИХ-аас  “ Гол мөрний урсац бүрэлдэх эх, усны сан бүхий газрын хамгаалалтын бүс ойн сан бүхий газарт ашигт малтмал, хайх, ашиглахыг хориглох тухай хууль”-ийг хэрэгжүүлэх журамд нэмэлт өөрчлөлт оруулах нь байгальд  ямар хор уршиг дагуулах тухай мэдээлсэн.  Нэмэлт өөрчлөлтөөр хамгаалалтын бүсийг Усны тухай хуульд заасан 200 ба түүнээс доош  50 метрээр тогтоож тооцох гэж байгаа нь хязгаарлах биш өргөтгөж, хайгуулын ажлыг улам нэмэгдүүлэх зорилготой байгаа нь УИХ  баталсан хууль болон бодлоготойгоо шуудаар илт зөрчилдсөн алхам хийхээр зэхэж байна гэж тэд мэдэгдээд байна. Энэхүү шийдвэрийг сар шинийн үеэр болон шөнийн цагт батлах магадлалтай байгааг онцлоод УИХ-ын дарга, УИХ-ын гишүүд, ард түмэнд хандан уриалга гаргасан байна. Мөн нутгийн иргэд, иргэдийн байгууллагын нэхэмжилснээр Монгол Улсын дээд шүүхийн шийдвэр гарч урт нэртэй хуулийг хэрэгжүүлэхийг шаардаж  байхад түүнд нэмэлт өөрчлөлт оруулж үгүйсгэх төсөл хэлэлцэх гэж байгаа нь УИХ баталсан хуулиа зөрчиж байгаагийн нотолгоо гэжээ. Энэ хуулийн дагуу орон нутгийн өөрийн эрх мэдэлд хамаарах шийдвэр гаргаж хамгаалах бүсийг тогтоосныг БОНХЯ дур мэдэн өөрчилж одоогийн санал болгож буй журмаар орон нутаг хамгаалах бүс тогтоох эрх мэдэлгүй болгож байгаа нь байгаль хамгаалах тухай хуулийн 16.1.3 заалтыг ноцтой зөрчиж байна гэж үзэж байна.       

Эх сурвалж: www.polit.mn