Г.БАТ-ӨЛЗИЙ

“Ноён уулаа аваръя” хөдөлгөөн, “Босоо Хөх Монгол” бүлгэмийнхэн газар шороо, уул ус, эд баялагтаа эзэн байх эрх ашгийг хамгаалж, төр засгийн хүмүүстэй бодлогын эсрэг тэмцэж өлсгөлөн зарлаад байгаа билээ. Хэлмэгдэгсдийн хөшөөны дэргэд тав хоног өлсгөлөн зарлаад байгаа найман хүний биеийн байдлын хувьд настай хүмүүсийн бие муудаж байгаа бөгөөд залуусын хувьд харьцангуй гайгүй байгаа юм байна. Тэд Урт нэртэй хууль болон Ноён уулан дээр хориг тавиачээ гэсэн хоёр хүсэлтийг  Ерөнхийлөгчид энэ сарын 10-нд өргөн барьсан боловч одоо болтол хариу ирээгүй байгаа бөгөөд цаашид хариу өгөхгүй бол тэмцлийн хурц хэлбэрт шилжин хуурай өлсгөлөн зарлахаа мэдэгдсэн юм. Мөн өнөөдөр Байгаль орчны иргэний зөвлөлийнхөн Ноён уулаа аварья, Босоо Хөх Монгол бүлгэмийнхэнтэй хамтрах гэсэн боловч “Ноён уулаа аварья”, “Босоо Хөх Монгол” бүлгэмийнхэн эсэргүүцэн хөөн явуулжээ. Энэ талаар “Босоо Хөх Монгол” ТББ-н тэргүүн Э.Төмөрхуягаас тодруулахад “Бид хувь хүний ашиг сонирхлоор нэгдээгүй бид ард түмний төлөө дуу хоолой болж явж байгаа болохоос хэн нэгний шоу хийх гэж бид энд амь биеэ хайрлалгүй даарч  хэвтээгүй. Байгаль орчны иргэний зөвлөл бол өөрөө Байгаль орчны яамнаас 34 сая төгрөгийн төсөл хэрэгжүүлдэг төсөлчин хүмүүс байдаг” гэж хэлсэн юм.

Харин Байгаль орчны иргэний зөвлөлийн гүйцэтгэх захирал Б.Эрдэнээ  “Монголын байгаль орчны иргэний зөвлөлөөс урт нэртэй хууль, Ноён уулын асуудал болон бусад байгаль орчны тулгамдсан асуудлуудаар хэвлэлийн бага хурал хийх гэсэн юм. Баяр ёслолыг тохиолдуулан далимдуулж хуулиа баталдаг луйвар хулгай хийдэг улс төрчдийн гар хурууны үзүүрийг тасалхад нэмэр больё гэж бид ирсэн. Харамсалтай нь “Ноён уулаа аварья”, “Босоо Хөх Монгол” бүлгэмийнхэн энэ бол бид нарын газар, та нар энд байж болохгүй гэж хөөж байна. Уул нь бид нар нэг зорилготой юм чинь дэмжье гэж ирсэн. Гэтэл энэ өлсөж байгаа хүмүүс худлаа юм байна яг үнэндээ монголын газар шорооны төлөө, монгол улс орныхоо төлөө энэ хүмүүс өлсөж хэвтээгүй юм байна, дуу хоолой нэгтээ хүмүүсийг ирэхээр хөөдөг энэ хүмүүсийг дэмжээд хэрэггүй” гэж хэлсэн юм.