Ц.БАЯР

Хөвсгөл далайд жил бүр болдог “Хөх сувдын орон” мөсний баяр ирэх сарын 3,4-нд болох гэж байна.  Мөсний зузаан 90 см- ээс дээш хөлдсөн  тохиолдолд мөсөн зам нээхийг зөвшөөрдөг.  Өнгөрсөн жил сайн хөлдөөгүйн улмаас мөсний баяр болоогүй юм.   Харин энэ жил баяр зохион байгуулах комисс газар дээр нь очиж Хөвсгөл далайн мөсний зузааныг хэмжиж  94-97 см зузаан хөлдсөн болохыг тогтоожээ. Иймээс “Хөх сувдын орон” мөсний баярыг гуравдугаар сарын 3,4 нд  Хатгал тосгоны Доод модот булан буюу Хүзүүвчийн шилд зохион байгуулахаар болсон байна. “Энэ жилийн мөсний баярыг Хөвсгөл аймгийн “ Аялал жуулчлалын холбоо”,  Аймгийн Засаг даргын тамгын газар хамтран зохион байгуулах юм байна. Энэ үеэр жуулчны долоон бааз ажиллана. Уг баярт зориулан шөнийн гэрэлтүүлгэтэй мөсөн хотхон байгуулахаар болжээ. Мөн мөсөн шагайн тэмцээн, чаргатай морьдын уралдаан явуулж, цаатан өрхтэй танилцуулан, цаа бугын үзүүлбэр үзүүлэхээс гадна үндэсний хувцасны өвлийн загварын үзүүлбэр үзүүлэхээр төлөвлөсөн тухай Хөвсгөл аймгийн “ Аялал жуулчлалын холбооны тэргүүн н.Наранчимэг ярьлаа.

Эх сурвалж:www.polit.mn