Ц.БАЯР  

Үндэсний статистикийн хороо 2015 оны нэгдүгээр сарын дүн мэдээгээ өнөөдөр танилцууллаа. Бүртгэлтэй ажилгүй иргэдийн тоо 35 мянга болж өмнөх оныхоос 7.6 хувиар буурч ажилгүйдлийн түвшин 7.7 хувьтай байна. Өрхийн дундаж мөнгөн орлого 972 мянган төгрөг болж өмнөх оныхоос 78 мянган төгрөг буюу 8.8 хувиар нэмэгдсэн бол  зарлага нь 988 мянган төгрөг болж 86 төгрөгөөр буюу 9.5 хувиар өссөн байна. Нийгмийн даатгалын сангийн орлого 60.8 тэрбум, зарлага нь 107.2 тэрбум төгрөг болж 17 хувиар өсчээ. Хүний хөгжил сангаас 996 мянган хүүхдэд 20.2 тэрбум төгрөгийг олгосон байна. Улсын хэмжээнд өнгөрсөн нэгдүгээр сард 2960 гэмт хэрэг гарч хэргийн тоо 300- аар нэмэгдэж 12 хувиар өсчээ. Өмчлөх эрхийн эсрэг 197 гэмт хэрэг гарсан нь  танхай болон бусад хэргүүдээс хамгийн их нь байжээ. Харин улсын хэмжээнд оны эхний нэг сарын байдлаар 6668 эх амаржиж төрөлт өмнөх оны мөн үетэй харицуулахад 3.4 хувиар өссөн буюу 234 хүүхдээр бүл нэмж  Монгол Улсын иргэн гурван сая болсон таатай мэдээг дуулгаж байв. Харин халдварт цусан суулгацаар өвчлөгсдийн тоо 65.2 хувиар бэлгийн замын халдварт өвчнөөр өвчлөгсөд 33 хувиар өсчээ. Энэ нь  өмнөх оны мөн үеийнхээс 627 хүнээр нэмэгдэж нийт халдварт өвчнөөр 3147  өвчилж 30 хувиар нэмэгдсэн нь статистик мэдээний хамгийн таагүй нь байлаа.

Эх сурвалж: www.polit.mn