Б.ТӨГС

Хан-Уул дүүргийн Өмч, газрын харилцааны албаныхан иргэдийг ихээр бухимдуулж байна. Тус албанд гэрчилгээгээ авахаар очсон, өргөдөл гаргахаар цаг заваа гарган очсон хүмүүс түгжээтэй хаалга мөргөөд буцаж байна. Учир нь тус албаныхан долоо хоногт ажлын гуравхан өдөртэй юм байна. Тодруулбал, мягмар, пүрэв гаригт гадуур ажилтай. “Даваа, лхагва, баасан гаригт үйлчлүүлнэ үү” гэсэн зарыг үүдэндээ наажээ. Ажлын цагаар иргэдэд үйлчлэх танхимынх нь хаалга, үүд тас цоожтой. Ажилтнаасаа эхлээд дарга даамал нь хүртэл байгаа шинж алга байв. Өмч, газрын харилцааны албаныхан ажлын таван өдрийн хоёрыг нь ингэж гадуур ажилтай нэрээр хийдүүлэх ямар шалтгаан байна вэ. Иргэдийг хүлээж авах ядаж хоёр хүнийг үлдээж болдоггүй хэрэг үү. Бүхэл бүтэн алба тасгаараа гадуур явж ажилладаг ямар төрийн алба вэ энэ. Хотын дарга та үүнийг анхааралдаа авч иргэдэд хүндрэл чирэгдэл учруулж байгаа энэ асуудлыг нааштайгаар шийдэж өгнө биз ээ. Замын түгжрэлтэй, завгүй өнөөгийн нийгэмд цоожтой хаалга мөргөөд буцах иргэдэд төрийн албаныхны энэ хүнд суртал үнэндээ таалагдахгүй байна.

Эх сурвалж: www.polit.mn